पर्सा पोस्ट , भदौ २७ गते , वीरगञ्ज ।
वीरगञ्जस्थित डी’ चिल्ड्रेन गार्डेन मन्टेसरीले महिला अभिभावक तथा शिक्षिकाहरूको सहभागितामा तीज विशेष कार्यक्रम सम्पन्न गरेको छ। विद्यालय परिसरमा आयोजित कार्यक्रममा महिला अभिभावक, शिक्षिका तथा विद्यालय परिवारको उत्साहपूर्ण सहभागिता रहेको थियो।
महिला अभिभावक तथा शिक्षिकाहरूको चाहनाअनुसार विद्यालयमै तीज कार्यक्रम आयोजना गरिएको विद्यालयले जनाएको छ। नेपाली महिलाहरूको महत्वपूर्ण पर्व हरितालिका तीजको अवसरमा आयोजित कार्यक्रमले आपसी सद्भाव, आत्मीयता तथा सामाजिक सम्बन्धलाई थप प्रगाढ बनाउनुका साथै नेपाली मौलिक संस्कृति र परम्पराको संरक्षणमा योगदान पुर्याउने विश्वास व्यक्त गरिएको छ।
विपद्को अवस्थालाई ध्यानमा राख्दै होटलको कार्यक्रम रद्द
विद्यालयकी सञ्चालिका तथा प्रधानाध्यापक रोशनी श्रीवास्तवले महिला अभिभावक तथा शिक्षिकाहरूको माग र चाहनालाई ध्यानमा राख्दै यस वर्ष विद्यालय परिसरमै तीज कार्यक्रम आयोजना गरिएको बताइन्।
उनका अनुसार यसअघि तीज कार्यक्रम आयोजना गर्न होटल बुकिङसमेत गरिसकिएको थियो। तर, देशमा आएको विनाशकारी बाढीका कारण उत्पन्न विपद्को अवस्थालाई मध्यनजर गर्दै होटलमा गर्ने कार्यक्रम रद्द गरी विद्यालयमै सामान्य तथा पारिवारिक वातावरणमा कार्यक्रम आयोजना गरिएको हो।
श्रीवास्तवले विपद्का बेला भड्किलो तथा खर्चिलो कार्यक्रम गर्नुभन्दा संयमित रूपमा पर्व मनाउनु उपयुक्त हुने धारणा व्यक्त गरिन्। उनले तीजको सांस्कृतिक महत्वलाई कायम राख्दै महिला अभिभावक तथा शिक्षिकाहरूबीच आत्मीयता र सद्भाव अभिवृद्धि गर्ने उद्देश्यले कार्यक्रमलाई निरन्तरता दिइएको स्पष्ट पारिन्।
तीज गीत तथा नृत्यले रमाइलो बन्यो कार्यक्रम
कार्यक्रममा सहभागी महिला अभिभावक तथा शिक्षिकाहरूले तीजका गीत तथा नृत्य प्रस्तुत गर्दै पर्वको उल्लास साटासाट गरेका थिए। उनीहरूले एकअर्कालाई तीजको शुभकामना दिँदै आपसी प्रेम, सद्भाव र पारिवारिक सम्बन्धलाई थप मजबुत बनाउने सन्देश दिएका थिए।
सहभागीहरूले तीज नेपाली महिलाहरूको धार्मिक, सांस्कृतिक तथा सामाजिक पहिचानसँग जोडिएको महत्वपूर्ण पर्व भएको उल्लेख गर्दै यस्ता कार्यक्रमले महिलाहरूलाई एकै ठाउँमा भेला भई आफ्ना अनुभव, भावना तथा खुसी साटासाट गर्ने अवसर प्रदान गर्ने बताए।
संस्कृति संरक्षणसँगै विद्यालय–अभिभावक सम्बन्धमा जोड
विद्यालय व्यवस्थापनका अनुसार बालबालिकालाई नेपाली मौलिक चाडपर्व, कला, संस्कृति तथा परम्पराबारे जानकारी गराउने उद्देश्यले विद्यालयमा विभिन्न सांस्कृतिक कार्यक्रम आयोजना हुँदै आएका छन्। यस्ता गतिविधिले बालबालिकामा आफ्नो संस्कृति र परम्प्रतिप्रति रुचि तथा सम्मानको भावना विकास गर्न सहयोग पुग्ने विद्यालयको विश्वास छ।
त्यसैगरी, विद्यालयमा अध्ययनरत बालबालिकाका अभिभावक र शिक्षकबीचको सम्बन्धलाई अझ सुमधुर बनाउन पनि यस्ता कार्यक्रमले महत्वपूर्ण भूमिका खेल्ने जनाइएको छ। विद्यालय र अभिभावकबीच सहकार्य, संवाद तथा आत्मीयता बढेमा बालबालिकाको शैक्षिक तथा सामाजिक विकासमा सकारात्मक प्रभाव पर्ने विद्यालय व्यवस्थापनको धारणा छ।
डी’ चिल्ड्रेन गार्डेन मन्टेसरीले आगामी दिनमा पनि विद्यार्थी, अभिभावक तथा शिक्षकलाई सहभागी गराउँदै नेपाली कला, संस्कृति, चाडपर्व तथा परम्परासँग सम्बन्धित कार्यक्रमलाई निरन्तरता दिने जनाएको छ।
