र्सा पोस्ट , असोज ०४ गते , पोखरा ।
उपभोक्ता हित संरक्षण मञ्च नेपालले उपभोक्ता अधिकारको संरक्षण, प्रवर्द्धन तथा जनचेतना अभिवृद्धिमा योगदान पुर्याएका देशभरका ११ जना उपभोक्ता अधिकारकर्मीलाई सम्मान गरेको छ । मञ्चको ३१औँ वार्षिक साधारण सभाको उद्घाटन सत्रमा शनिबार पोखरामा उनीहरूलाई सम्मान गरिएको हो ।
सम्मानित हुनेमा उपभोक्ता हित संरक्षण मञ्च नेपालका केन्द्रीय सदस्य (पर्सा) एवं पत्रकार अजित कुमार भुजेल, केन्द्रीय सदस्य (सिरहा) एवं पत्रकार जिवछ चौधरी, जुना श्रेष्ठ ( मकवानपुर ) , सुदूरपश्चिम प्रदेश समिति सचिव तथा पत्रकार एकिन्द्र तिमिल्सेना, कर्णाली प्रदेश अध्यक्ष बिन्दुलाल रेग्मी, रुपन्देही जिल्ला समिति अध्यक्ष समुन्द्र जीसी, सिन्धुपाल्चोक जिल्ला समिति अध्यक्ष शालिग्राम अधिकारी र मोरङ जिल्ला समिति अध्यक्ष तारानाथ भट्टराई रहेका छन् ।
यस्तै, मञ्चले लामो समयसम्म उपभोक्ता अधिकारको क्षेत्रमा पुर्याएको योगदानको मूल्याङ्कन गर्दै पूर्व केन्द्रीय सदस्य तथा पत्रकार किशोरजंग थापा (गोरखा), पूर्व केन्द्रीय सदस्य राम शर्मा (बागलुङ) र पूर्व केन्द्रीय सदस्य रामजी प्रसाद ज्ञवाली (परासी) लाई समेत सम्मान गरेको हो ।
सम्मानित अधिकारकर्मीहरूलाई कार्यक्रमका प्रमुख अतिथि कास्कीका प्रमुख जिल्ला अधिकारी कुमान सिंह गुरुङ र विशिष्ट अतिथि पोखरा महानगरपालिकाका प्रमुख प्रशासकीय अधिकृत राजन पौडेलले दोसल्ला ओढाएर सम्मानपत्र प्रदान गरेका थिए ।
मञ्चका केन्द्रीय उपाध्यक्ष तथा सम्मान छनोट समितिका सदस्य धनपति ढुङ्गेलका अनुसार उपभोक्ता अधिकार संरक्षणको क्षेत्रमा सम्बन्धित व्यक्तिहरूले पुर्याएको योगदान, सक्रियता र भूमिकालाई आधार बनाएर सम्मानका लागि नाम छनोट गरिएको हो ।
सम्मान छनोटका लागि मञ्चका उपाध्यक्ष अजय अधिकारीको संयोजकत्वमा उपाध्यक्षद्वय सुवर्णप्रभा गुरागाईं र धनपति ढुङ्गेल सदस्य रहेको समिति गठन गरिएको थियो । उक्त समितिले देशका विभिन्न जिल्लामा उपभोक्ता अधिकार संरक्षणका क्षेत्रमा सक्रिय व्यक्तिहरूको योगदानको मूल्याङ्कन गरी सम्मानित व्यक्तिहरूको छनोट गरेको जनाएको छ ।
मञ्चले उपभोक्ताको हकहित संरक्षण, बजार अनुगमन, गुणस्तरीय तथा सुरक्षित वस्तु तथा सेवाको सुनिश्चितता, उपभोक्ता सचेतना अभिवृद्धि र उपभोक्ता अधिकारसम्बन्धी कानुनी व्यवस्थाको प्रभावकारी कार्यान्वयनका लागि निरन्तर आवाज उठाउँदै आएको छ ।
३१औँ वार्षिक साधारण सभाका अवसरमा गरिएको सम्मानलाई उपभोक्ता अधिकारको क्षेत्रमा सक्रिय व्यक्तिहरूको योगदानको संस्थागत कदरका रूपमा लिइएको छ । सम्मानले देशभर उपभोक्ता अधिकारको अभियानलाई थप प्रभावकारी बनाउन सक्रिय अधिकारकर्मीहरूलाई प्रोत्साहन पुग्ने मञ्चले जनाएको छ ।
