पर्सा पोस्ट, भदौ १८ गते, वीरगञ्ज ।
श्रीकृष्ण जन्माष्टमीको पावन अवसरमा ब्रह्माकुमारी राजयोग सेवा केन्द्र, छपकैया–२ वीरगञ्जको आयोजनामा शुक्रबार विशेष आध्यात्मिक तथा सांस्कृतिक कार्यक्रम सम्पन्न भएको छ। कार्यक्रममा प्रस्तुत गरिएको आकर्षक झाँकी, कृष्णलीला तथा नृत्य प्रस्तुतिले उपस्थित दर्शकलाई मनोरञ्जनसँगै आध्यात्मिक अनुभूति प्रदान गरेको थियो।
कार्यक्रमको अध्यक्षता ब्रह्माकुमारी राजयोग सेवा, बारा, पर्सा र रौतहटकी क्षेत्रीय सभापति ब्रह्माकुमारी रबिना दिदीले गर्नुभएको थियो भने पर्सा जिल्ला अदालतका न्यायाधीश महेन्द्रप्रसाद पोखरेलको प्रमुख आतिथ्यमा कार्यक्रम सम्पन्न भएको थियो।
कार्यक्रममा संविधानसभा सदस्य जयप्रकाश थारु, वीरगञ्ज उद्योग वाणिज्य संघका अध्यक्ष हरि गौतम, समाजसेवी उषा शाह, मधु राणा, छपकैया सामुदायिक प्रहरी सेवा केन्द्र छपकैया–२ का अध्यक्ष हाजी ग्यासुदिन ठकुराई, राजधानी दैनिकका मधेस प्रदेश ब्युरो प्रमुख तुलसी भण्डारी, नेपाल पत्रकार महासंघ पर्साका पूर्वउपाध्यक्ष युवराज खड्का, नेपाल पत्रकार महासंघ पर्साका सदस्य एवं पर्सा पोस्टका सञ्चालक अजित भुजेल, वीरगञ्ज महानगरपालिका वडा नं. २ की महिला वडा सदस्य संगीता थापा भुजेललगायत विभिन्न संघसंस्था तथा क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो।
कार्यक्रममा श्रीकृष्णको जीवन, उहाँको बाल्यकालदेखि नै समाज र मानव जीवनमा पुर्याउनुभएको योगदान तथा उहाँका आदर्श र शिक्षाबारे चर्चा गरिएको थियो। वक्ताहरूले श्रीकृष्ण जन्माष्टमीलाई धार्मिक पर्वका रूपमा मात्र नभई सत्य, प्रेम, सद्भाव, कर्तव्य, आत्मअनुशासन र सकारात्मक जीवनशैलीको सन्देश दिने महत्वपूर्ण अवसरका रूपमा लिनुपर्ने धारणा व्यक्त गरेका थिए।
श्रीकृष्णको जन्मदेखि बाल्यकालसम्मका विभिन्न प्रसंगलाई झल्काउने विशेष झाँकी तथा कृष्णलीला प्रस्तुत गरिएको थियो। कृष्णको बालरूप, उहाँका जीवनसँग जोडिएका विभिन्न धार्मिक तथा सांस्कृतिक प्रसंगलाई कलात्मक रूपमा प्रस्तुत गरिँदा कार्यक्रमस्थलमा उपस्थित दर्शकहरू आकर्षित भएका थिए।
त्यसैगरी कलाकार तथा सहभागीहरूले प्रस्तुत गरेका कृष्णलीलासहितका नृत्य तथा सांस्कृतिक प्रस्तुतिले कार्यक्रमलाई थप रोचक बनाएको थियो। धार्मिक तथा आध्यात्मिक वातावरणबीच प्रस्तुत गरिएको नृत्य र झाँकीले दर्शकलाई मनोरञ्जन प्रदान गर्नुका साथै श्रीकृष्णका जीवन प्रसंगसँग जोडिने अवसरसमेत दिएको थियो।
कार्यक्रममा ब्रह्मकुमार गोकुलले स्वागत मन्तव्य राख्दै श्रीकृष्ण भगवानको जीवन, उहाँका आदर्श तथा शिक्षाबारे प्रकाश पार्नुभएको थियो। उहाँले श्रीकृष्णका सकारात्मक गुण र आदर्शलाई आत्मसात गर्दै आफू असल बन्न र समाजमा अरूलाई पनि असल बन्न प्रेरित गर्नुपर्नेमा जोड दिनुभएको थियो।
वक्ताहरूले श्रीकृष्णले प्रतिकूल परिस्थितिमा पनि सत्य र धर्मको पक्षमा उभिन दिएको सन्देश आजको समाजका लागि पनि उत्तिकै सान्दर्भिक रहेको बताए। श्रीकृष्णको जीवनबाट प्रेम, करुणा, विवेक, साहस, कर्तव्यनिष्ठा र मानवताको पाठ सिकेर व्यवहारमा उतार्न सके समाजमा सकारात्मक परिवर्तन ल्याउन सकिने उनीहरूको भनाइ थियो।
कार्यक्रममा सहभागी अतिथिहरूले श्रीकृष्ण जन्माष्टमीको अवसरमा सबैमा शान्ति, सुख, समृद्धि, सद्भाव र सकारात्मक चेतनाको विकास होस् भन्ने शुभकामना व्यक्त गरेका थिए। साथै श्रीकृष्णका आदर्शलाई व्यवहारमा उतार्दै आफू पनि उहाँजस्तै असल बन्ने र अरूलाई पनि असल बन्न प्रेरित गर्ने संकल्प लिनुपर्नेमा जोड दिइएको थियो।
कार्यक्रमको अन्त्यमा ब्रह्मकुमार गोभर्धनले धन्यवाद ज्ञापन गर्दै कार्यक्रम सफल बनाउन सहयोग गर्ने अतिथि, कलाकार, सहभागी, आयोजक तथा उपस्थित सम्पूर्ण दर्शकप्रति आभार व्यक्त गर्नुभएको थियो।
आध्यात्मिक चेतना, धार्मिक संस्कार र सांस्कृतिक प्रस्तुतिको संगम बनेको उक्त कार्यक्रमले श्रीकृष्ण जन्माष्टमीको अवसरमा उपस्थित सबैमा सकारात्मक सन्देश प्रवाह गरेको आयोजकले जनाएको छ।
