पर्सा पोस्ट, भदौ २२ गते, वीरगञ्ज ।
रसुवा जिल्लामा हालै आएको विनाशकारी बाढी तथा प्राकृतिक विपद्बाट प्रभावित नागरिकहरूको राहत, उद्धार तथा पुनःस्थापनामा सहयोग पुर्याउने उद्देश्यले वीरगञ्जस्थित नेशनल मेडिकल कलेज प्रा.लि. र काठमाडौं गोकर्णेश्वरस्थित नेपाल मेडिकल कलेज प्रा.लि. ले संयुक्त रूपमा ७५ लाख रुपैयाँ आर्थिक सहयोग गरेका छन्।
नेपाल मेडिकल कलेज परिवार र नेशनल मेडिकल कलेज परिवारको संयुक्त योगदानस्वरूप प्रधानमन्त्री दैवी प्रकोप उद्धार कोष (बाढी राहत) मा रु. ७५ लाख जम्मा गरिएको हो।
बाढी तथा प्राकृतिक विपद्का कारण रसुवाका विभिन्न क्षेत्रमा प्रभावित परिवार तथा समुदायले ठूलो मानवीय तथा भौतिक क्षति व्यहोर्नुपरेको अवस्थामा राहत, उद्धार र पुनःस्थापनाका कार्यमा सहयोग पुर्याउने उद्देश्यले उक्त रकम प्रदान गरिएको दुवै संस्थाले जनाएका छन्।
स्वास्थ्य सेवामा लामो समयदेखि सक्रिय दुवै मेडिकल कलेजले विपद्को कठिन परिस्थितिमा सामाजिक उत्तरदायित्वलाई प्राथमिकतामा राख्दै प्रभावित नागरिकको साथमा उभिएको बताएका छन्। उनीहरूको संयुक्त आर्थिक सहयोगले बाढीपीडितका लागि सञ्चालन हुने राहत वितरण, उद्धार तथा पुनःस्थापनाका प्रयासमा थप टेवा पुग्ने अपेक्षा गरिएको छ।
मानवीय सेवाको भावनाबाट गरिएको यस सहयोगले विपद्को समयमा स्वास्थ्य संस्था, स्वास्थ्यकर्मी तथा समुदायबीचको सहकार्य र सामाजिक उत्तरदायित्वको भावना अझ मजबुत बनाउने विश्वास गरिएको छ।
नेशनल मेडिकल कलेज वीरगञ्ज र नेपाल मेडिकल कलेज काठमाडौंले आगामी दिनमा पनि रसुवालगायत देशका विभिन्न क्षेत्रमा प्राकृतिक विपद्बाट प्रभावित नागरिकहरूको आवश्यकता र परिस्थितिअनुसार मानवीय तथा सामाजिक सेवाका कार्यमा सहयोगलाई निरन्तरता दिने प्रतिबद्धता व्यक्त गरेका छन्।
विपद्को समयमा स्वास्थ्य संस्थाहरूबाट गरिएको यस्तो सहयोगले राहत तथा पुनःस्थापनाका सरकारी प्रयासमा समेत महत्वपूर्ण सहयोग पुग्ने विश्वास गरिएको छ।
