पर्सा पोस्ट , असार २१ गते , रक्सौल, पूर्वी चम्पारण ।
पूजा केवल मन्दिर, तीर्थस्थल, गुरुद्वारा वा मस्जिदको भ्रमणमा सीमित नभई आत्मिक अनुशासन र आत्मशुद्धिको माध्यम भएको सामाजिक अभियन्ता बिमल सर्राफले बताएका छन्। लायन्स इन्टरनेशनल डिस्ट्रिक्ट (३२२ ई) का जोनल चेयरपर्सन, डिस्ट्रिक्ट चेयरपर्सन, भारत विकास परिषद् रक्सौलका सेवा संयोजक, मिडिया प्रभारी तथा सामाजिक कार्यकर्ता सर्राफले प्रेससँग कुरा गर्दै आजको समाजमा पूजा–आराधनाको वास्तविक उद्देश्य हराउँदै गएकोप्रति चिन्ता व्यक्त गरेका हुन्।
उनले वर्तमान समयमा अधिकांश मानिसका लागि पूजा केवल औपचारिकता र परम्परागत कर्मकाण्डमा सीमित बन्दै गएको उल्लेख गर्दै यसले जीवनका चुनौती, संघर्ष र नैतिक जिम्मेवारीसँग सम्बन्ध स्थापित गर्न नसकेको बताए। “प्रश्न मानिसहरूले पूजा गर्छन् कि गर्दैनन् भन्ने होइन, प्रश्न त उनीहरूको पूजा कति अर्थपूर्ण छ भन्ने हो,” उनले भने।
सर्राफका अनुसार साँचो पूजा भनेको आत्मनिरीक्षण, अनुशासन, ध्यान र आत्मशुद्धिको अभ्यास हो। यसले व्यक्तिको अन्तस्करणलाई निर्मल बनाउँदै सकारात्मक ऊर्जा, धैर्यता, करुणा, विवेक र साहसको विकास गराउँछ। उनले हाम्रा पुर्खाहरूले तपस्या, ध्यान र साधनामार्फत जीवनलाई अनुशासित बनाएको स्मरण गर्दै पूजा उनीहरूका लागि केवल धार्मिक अनुष्ठान नभई जीवन जिउने पद्धति रहेको बताए।
उनले आधुनिक समाजमा बढ्दो तनाव, असहिष्णुता र नैतिक विचलनलाई नियन्त्रण गर्न आध्यात्मिक चेतनाको आवश्यकता औंल्याउँदै पूजालाई बाह्य प्रदर्शनभन्दा आन्तरिक रूपान्तरणको माध्यमका रूपमा बुझ्नुपर्ने धारणा राखे। “जब व्यक्तिको हृदय विश्वास, भक्ति र सत्यप्रतिको समर्पणले भरिन्छ, तब मात्रै पूजा सार्थक हुन्छ,” उनले बताए।
सर्राफले समाजमा शान्ति, सहिष्णुता र मानवताको भावनालाई मजबुत बनाउन आध्यात्मिक चेतना अपरिहार्य रहेको उल्लेख गर्दै युवा पुस्तालाई पनि सकारात्मक सोच, नैतिकता र अनुशासित जीवनतर्फ प्रेरित हुन आग्रह गरे। उनले साँचो पूजा त्यही भएको बताए जसले व्यक्तिको अन्तस्करणलाई यति शुद्ध बनाउँछ कि त्यसभित्र ईश्वरको प्रतिबिम्ब देखिन थाल्छ।
