पर्सा पोस्ट, असार १५ गते, रक्सौल।
वातावरण संरक्षण, सामाजिक सद्भाव तथा शिक्षाको क्षेत्रमा उल्लेखनीय योगदान पुर्याएको भन्दै रक्सौलका वातावरणविद् तथा सामाजिक अभियन्ता डा. अरुण कुमार गुप्तालाई अन्तर्राष्ट्रिय संस्था वर्ल्ड फेडरेशन अफ द आर्ट्स, लिटरेचर, एजुकेशन, पिस एण्ड कल्चर (FEMALPC), पेरु गणराज्य ले “समावेशीकरण र शान्तिको संस्कृतिमा केन्द्रित शिक्षासहित सम्मानित विद्यावारिधि” को मानार्थ उपाधि प्रदान गरेको छ।
समावेशीकरण, शान्ति, शिक्षा, वातावरणीय संरक्षण तथा मानवीय मूल्यमान्यताको प्रवर्द्धनमा निरन्तर सक्रिय भूमिका निर्वाह गरेको मूल्यांकन गर्दै उक्त सम्मान प्रदान गरिएको संस्थाले जनाएको छ। संस्थाद्वारा प्रदान गरिएको प्रशंसापत्रमा डा. गुप्ताको सामाजिक उत्तरदायित्व, वातावरणप्रतिको समर्पण तथा मानव सेवाप्रतिको प्रतिबद्धताको उच्च प्रशंसा गरिएको उल्लेख छ।
सम्मान प्राप्तिपछि प्रतिक्रिया दिँदै डा. अरुण कुमार गुप्ताले यो उपलब्धि आफ्नो व्यक्तिगत सम्मान मात्र नभई वातावरण संरक्षण र सामाजिक सेवामा समर्पित सम्पूर्ण सहकर्मी, स्वयंसेवक तथा शुभेच्छुकहरूको साझा पहिचान भएको बताए। उनले यस उपलब्धिको श्रेय आफ्ना आमाबाबु, गुरुजन, परिवार, साथीभाइ तथा निरुजा ग्रिन इन्डिया फेमिली फाउन्डेसनका सदस्य एवं सहयोगीहरूलाई दिएका छन्।
उनले वातावरण संरक्षण आजको आवश्यकता मात्र नभई मानव अस्तित्वकै आधार भएको उल्लेख गर्दै प्रत्येक नागरिकले वृक्षारोपण, जल संरक्षण, सरसफाइ तथा प्लास्टिकमुक्त जीवनशैली अपनाउनुपर्नेमा जोड दिए। “यदि सबैले आ–आफ्नो ठाउँबाट सानो प्रयास गर्ने हो भने भावी पुस्तालाई सुरक्षित, स्वच्छ र स्वस्थ वातावरण दिन सकिन्छ,” उनले भने।
डा. गुप्ताले यस प्रतिष्ठित सम्मानका लागि FEMALPC पेरुका संस्थापक, पदाधिकारी तथा निर्णायक मण्डलप्रति आभार व्यक्त गर्दै यो सम्मानले समाज, शिक्षा तथा वातावरणीय संरक्षणको क्षेत्रमा अझ समर्पित भएर काम गर्न प्रेरणा दिएको बताए। साथै उनले हरित, स्वच्छ र वातावरणीय रूपमा सुरक्षित भारत निर्माणका लागि सबै नागरिकलाई सक्रिय भूमिका निर्वाह गर्न आग्रह गरे।
यस उपलब्धिप्रति रक्सौलका विभिन्न सामाजिक तथा व्यावसायिक संस्थाका प्रतिनिधिहरूले समेत बधाई व्यक्त गरेका छन्। भारत विकास परिषद् रक्सौलका अध्यक्ष रजनीश प्रियदर्शी, लायन्स क्लब अफ रक्सौलका अध्यक्ष तथा मिडिया इन्चार्ज बिमल सर्राफ र टेक्सटाइल चेम्बर अफ कमर्सका महासचिव आलोक श्रीवास्तवले डा. गुप्ताको सम्मानले रक्सौल क्षेत्रको गौरव बढाएको बताएका छन्।
