पर्सा पोस्ट , जेष्ठ ०८ गते , रक्सौल, पूर्वी चम्पारण ।
सामाजिक कार्यकर्ता तथा Lions Club of Raxaul का अध्यक्ष एवं मिडिया प्रभारी, साथै Bharat Vikas Parishad का सेवा संयोजक बिमल सर्राफले सत्य, जीवन र आध्यात्मिक चेतनाबारे आफ्नो धारणा सार्वजनिक गरेका छन्। प्रेससँग कुरा गर्दै उनले सत्य एउटै हुने तर त्यसलाई बुझ्ने र प्राप्त गर्ने बाटाहरू अनेक हुन सक्ने बताए।
उनले भने, “सत्य एक हो, धेरै होइन। एउटै सत्य विभिन्न रूप र माध्यममार्फत प्रकट हुन्छ। जसरी चन्द्रमा एउटै हुन्छ, तर नदीको पानीका प्रत्येक थोपामा फरक–फरक रूपमा देखिन्छ, त्यसैगरी सत्य पनि विभिन्न अनुभूतिमा अभिव्यक्त हुन्छ।”
सर्राफले सत्यलाई केवल बाहिरी दृष्टिले मात्र नभई गहिरो आत्मबोधमार्फत बुझ्नुपर्ने धारणा राखे। उनका अनुसार मानिसले आँखाले देख्ने कुरा संवेदी सत्य मात्र हो भने जीवनमा अनुभव गरिने सत्य सापेक्षिक सत्य हो। उनले निरपेक्ष सत्य समय, स्थान र परिस्थितिभन्दा माथि रहने उल्लेख गर्दै “ईश्वर नै पूर्ण र निरपेक्ष सत्यको प्रतीक हुन सक्नुहुन्छ” भन्ने विचार व्यक्त गरे।
उनले सत्यको खोज स्वतन्त्र जिज्ञासाबाट सुरु हुने बताए। “जहाँ जिद्द हुन्छ, त्यहाँ सत्य आउन सक्दैन। सत्यको खोजका लागि खुला सोच, विवेक र आत्मअन्वेषण आवश्यक हुन्छ,” उनले भने। उपनिषदको उदाहरण दिँदै उनले सत्यको चाहना हुने व्यक्तिले मनलाई कुनै पूर्वाग्रह वा अहंकारमा बाँध्न नहुने धारणा व्यक्त गरे।
उनका अनुसार वर्तमान समाजमा मानिसहरू बाह्य आकर्षण, भ्रम र सीमित सोचमा अल्झिँदा वास्तविक सत्यबाट टाढा भइरहेका छन्। सत्यलाई प्राप्त गर्न आत्मचिन्तन, विवेक र सकारात्मक जिज्ञासा अपरिहार्य रहेको उनले बताए।
सामाजिक तथा आध्यात्मिक विषयमा सक्रिय सर्राफले युवापुस्तालाई सत्य, नैतिकता र मानवताको मार्गमा अघि बढ्न आग्रह गर्दै समाजमा सकारात्मक सोच र सहिष्णुताको विकास गर्नुपर्नेमा जोड दिएका छन्।
