पर्सा पोस्ट, चैत २४ गते, जनकपुर ।
नेपाल उद्योग वाणिज्य महासंघ–मधेश प्रदेशको सातौं प्रदेश सभा तथा निर्वाचन २०८२ को उद्घाटन समारोह जनकपुरमा भव्य रूपमा सम्पन्न भएको छ।
कार्यक्रमको उद्घाटन महासंघ मधेश प्रदेशका अध्यक्ष तथा केन्द्रीय कार्यसमिति सदस्य अशोक टेमानी र मधेश प्रदेशका माननीय मुख्यमन्त्री कृष्ण यादवले संयुक्त रूपमा गमलामा पानी हालेर गरेका थिए।
महासंघ मधेश प्रदेशका अध्यक्ष अशोक टेमानीको अध्यक्षतामा सम्पन्न उक्त कार्यक्रममा प्रमुख अतिथिका रूपमा मुख्यमन्त्री कृष्ण यादवको उपस्थिति रहेको थियो।
कार्यक्रममा विशिष्ट अतिथिका रूपमा प्रहरी नायब महानिरीक्षक गोविन्द थपलिया, मधेश प्रदेश सशस्त्र प्रहरीका नायब महानिरीक्षक कृष्ण ढकाल लगायत विभिन्न जिल्लाका उद्योग वाणिज्य संघका अध्यक्ष, पदाधिकारी तथा व्यवसायीहरूको उल्लेखनीय सहभागिता रहेको थियो।
कार्यक्रमलाई सम्बोधन गर्दै अध्यक्ष टेमानीले मधेश प्रदेशको समग्र विकासमा निजी क्षेत्रको भूमिका महत्वपूर्ण रहेको उल्लेख गर्दै प्रदेशलाई आर्थिक रूपमा सबल बनाउने दिशामा महासंघ प्रतिबद्ध रहेको बताए। उनले नयाँ आर्थिक सम्भावनाको पहिचान, लगानीमैत्री वातावरण निर्माण तथा नीतिगत सहजीकरणमार्फत निजी क्षेत्रलाई सशक्त बनाउने लक्ष्य रहेको स्पष्ट पारे।
उनले भने, “मधेश प्रदेशलाई विकसित र समृद्ध बनाउन निजी क्षेत्रलाई उकास्नु आवश्यक छ। त्यसका लागि नयाँ आर्थिक मेरुदण्डहरूको खोजी गर्दै लगानीको वातावरण सुधार र नीतिगत सहजीकरणमा जोड दिनुपर्छ।”
कार्यक्रमका अवसरमा वर्षभर उत्कृष्ट कार्य गर्ने व्यक्ति तथा संस्थाहरूलाई सम्मान गरिएको थियो। साथै ‘समृद्ध मधेश’ नामक पुस्तकको विमोचन समेत गरिएको थियो, जसमा प्रदेशको विकास, लगानी सम्भावना र नीतिगत मार्गचित्र समेटिएको छ।
कार्यक्रमको सञ्चालन संजय साहले गरेका थिए।
