पर्सा पोस्ट, असोज २६ गते, वीरगञ्ज ।
निजी विद्यालयबीच आपसी एकता, भाइचारा, सद्भाव र प्रेमभावलाई थप प्रगाढ बनाउने उद्देश्यले निजी तथा आवासीय विद्यालय संगठन नेपाल (प्याब्सन) वीरगञ्ज महानगर र प्याब्सन पर्साद्वारा संयुक्त रूपमा विजयादशमी, शुभ दीपावली तथा छठ पर्वको अवसरमा शुभकामना आदानप्रदान कार्यक्रम भव्य रूपमा सम्पन्न भएको छ।
प्याब्सन पर्साका अध्यक्ष सरोज प्रसाद चौधरीको अध्यक्षतामा सम्पन्न कार्यक्रममा प्याब्सनमा आबद्ध विभिन्न विद्यालयका सञ्चालक, शिक्षक, शिक्षिका तथा संगठनका पदाधिकारीहरूको उल्लेखनीय सहभागिता रहेको थियो।
कार्यक्रममा सहभागीहरूले नेपालीहरूको महान् पर्व विजयादशमी, शुभ दीपावली तथा छठको अवसरमा एकअर्कालाई शुभकामना व्यक्त गर्दै आपसी प्रेम, सद्भाव, सहिष्णुता र सामाजिक एकताको सन्देश आदानप्रदान गरेका थिए।
कार्यक्रममा वक्ताहरूले चाडपर्व केवल धार्मिक तथा सांस्कृतिक उत्सव मात्र नभई एकअर्काबीचको सम्बन्धलाई अझ आत्मीय बनाउने, मनमुटाव हटाउने र समाजमा भाइचाराको भावना विकास गर्ने महत्त्वपूर्ण अवसरसमेत भएको धारणा व्यक्त गरेका थिए। विशेषगरी निजी विद्यालयका सञ्चालक, शिक्षक तथा शैक्षिक क्षेत्रसँग आबद्ध व्यक्तित्वहरूबीच यस्ता कार्यक्रमले आपसी विश्वास, सहकार्य र समन्वयलाई बलियो बनाउन सहयोग पुग्ने उनीहरूको विश्वास थियो।
प्याब्सन नगर र जिल्ला समितिले संयुक्त रूपमा आयोजना गरेको यस कार्यक्रमले शैक्षिक क्षेत्रका व्यक्तित्वहरूलाई एउटै थलोमा भेला गराई आपसी सम्बन्ध सुमधुर बनाउनुका साथै साझा शैक्षिक विषयमा विचार आदानप्रदान गर्ने अवसर प्रदान गरेको सहभागीहरूले बताएका थिए।
कार्यक्रममा प्याब्सन वीरगञ्जका उपाध्यक्ष शर्मानन्द कुशवाहा, महिला वरिष्ठ उपाध्यक्ष सुशीला साह, वरिष्ठ सल्लाहकार प्रकाश उपाध्याय, अशोक सङ्रौला, लालबहादुर गुरुङ, अमित आलोक, विजय बललगायत प्याब्सनका पदाधिकारी तथा सदस्यहरूको उपस्थिति रहेको थियो।
विजयादशमीले असत्यमाथि सत्यको विजय र अन्यायमाथि न्यायको सन्देश दिने, दीपावलीले उज्यालो, आशा र समृद्धिको प्रेरणा प्रदान गर्ने तथा छठ पर्वले प्रकृति, सूर्य र जलप्रतिको आस्था तथा कृतज्ञताको भावना अभिव्यक्त गर्ने भएकाले यी पर्वले समाजमा सकारात्मक सोच र मानवीय सम्बन्धलाई थप बलियो बनाउन महत्त्वपूर्ण भूमिका खेल्ने सहभागीहरूको भनाइ थियो।
यस्ता शुभकामना आदानप्रदान कार्यक्रमले जातीय, धार्मिक तथा सांस्कृतिक विविधताबीच आपसी सम्मान, सहिष्णुता र सद्भाव कायम राख्न सहयोग पुग्ने विश्वास व्यक्त गर्दै सहभागीहरूले आगामी दिनमा पनि निजी विद्यालयबीच एकता र सहकार्यलाई निरन्तरता दिने धारणा राखेका थिए।
प्याब्सन नगर र जिल्ला समितिको संयुक्त आयोजनामा सम्पन्न कार्यक्रम सौहार्दपूर्ण वातावरणमा सम्पन्न भएको आयोजकले जनाएको छ।
