पर्सा पोस्ट, भदौ ०३ गते, सिमरा, बारा।
सिमरा विमानस्थलमा बुधबारदेखि यात्रु तथा विमानस्थलमा कार्यरत कर्मचारीलाई लक्षित गर्दै निःशुल्क स्वास्थ्य सहायता कक्ष (हेल्थ डेस्क) सञ्चालनमा आएको छ। नेशनल मेडिकल कलेज तथा शिक्षण अस्पताल, वीरगञ्जको सहकार्यमा स्थापना गरिएको स्वास्थ्य सहायता कक्षको उद्घाटन कलेजका अध्यक्ष प्रो. डा. जैनुद्दिन अन्सारीले एक कार्यक्रमबीच गरेका हुन्।
सरकारले अघि सारेको १०० दिने विकास कार्यक्रमअन्तर्गत देशका विमानस्थलमा आकस्मिक स्वास्थ्य सेवा उपलब्ध गराउने उद्देश्यले स्वास्थ्य सहायता कक्ष स्थापना गर्ने कार्यक्रमअनुसार सिमरा विमानस्थलमा पनि सेवा सुरु गरिएको हो।
स्वास्थ्य सहायता कक्षबाट विमानस्थलमा आउने–जाने यात्रुका साथै विमानस्थलका कर्मचारी, सरसफाइ कर्मचारी, सुरक्षाकर्मी तथा अन्य सेवाग्राहीलाई आकस्मिक स्वास्थ्य परीक्षण, प्राथमिक उपचार तथा चिकित्सकीय परामर्श उपलब्ध गराइनेछ।
बिहान ९ बजेदेखि साँझ ५ बजेसम्म सेवा
नेशनल मेडिकल कलेजका प्रबन्ध निर्देशक शाहनवाज अन्सारीका अनुसार प्रारम्भिक चरणमा हेल्थ डेस्क बिहान ९ बजेदेखि साँझ ५ बजेसम्म सञ्चालन हुनेछ। विमानस्थलमा यात्रुको चाप तथा स्वास्थ्य सेवाको आवश्यकता बढ्दै गएमा आगामी दिनमा सेवा सञ्चालनको समय थप गर्न सकिने उनले बताए।
विमानस्थल प्रमुख विष्णुप्रसाद अधिकारीका अनुसार विमानस्थलमा कुनै यात्रु वा कर्मचारीलाई अचानक स्वास्थ्य समस्या देखिएमा हेल्थ डेस्कबाट तत्काल प्रारम्भिक स्वास्थ्य जाँच तथा आवश्यक प्राथमिक उपचार उपलब्ध गराइनेछ।
गम्भीर प्रकृतिको स्वास्थ्य समस्या देखिएमा थप उपचारका लागि सम्बन्धित स्वास्थ्य संस्थामा तत्काल पठाउने व्यवस्था मिलाइनेछ। यसले विमानस्थलमा आकस्मिक स्वास्थ्य समस्या उत्पन्न हुँदा उपचारका लागि बाहिर जानुपर्ने अवस्थासम्मको प्रारम्भिक समय व्यवस्थापन गर्न सहयोग पुग्ने अपेक्षा गरिएको छ।
विपद् तथा ठूलो दुर्घटनामा डिजास्टर रेस्पोन्स टिम परिचालन
विमानस्थलमा कुनै विपद्, दुर्घटना वा ठूलो आकस्मिक घटना भएमा नेशनल मेडिकल कलेजको डिजास्टर रेस्पोन्स टिम परिचालन गरी आवश्यक स्वास्थ्य सहायता उपलब्ध गराइने जनाइएको छ।
यस्तो व्यवस्थाले विमानस्थलमा सम्भावित आकस्मिक घटनाका बेला घाइते तथा बिरामीको प्रारम्भिक उपचार, स्वास्थ्य परीक्षण र आवश्यकताअनुसार थप उपचारका लागि रेफर गर्न महत्वपूर्ण सहयोग पुग्ने विश्वास गरिएको छ।
चिकित्सक तथा स्वास्थ्यकर्मीको नियमित टोली
हेल्थ डेस्कमा नेशनल मेडिकल कलेजका चिकित्सक तथा स्वास्थ्यकर्मीको टोलीले नियमित रूपमा सेवा प्रदान गर्नेछ। विमानस्थल परिसरमै निःशुल्क स्वास्थ्य सेवा उपलब्ध भएपछि यात्रु तथा कर्मचारीलाई अचानक स्वास्थ्य समस्या पर्दा तत्काल चिकित्सकीय सहायता लिन सहज हुने भएको छ।
विशेषगरी लामो दूरीको यात्रा गर्ने यात्रु, वृद्धवृद्धा, बालबालिका तथा यात्रा क्रममा अचानक स्वास्थ्य समस्या देखिने व्यक्तिका लागि हेल्थ डेस्क उपयोगी हुने अपेक्षा गरिएको छ।
विमानस्थल प्रशासन र नेशनल मेडिकल कलेजबीचको सहकार्यमा सुरु गरिएको उक्त स्वास्थ्य सहायता कक्षलाई सेवाको आवश्यकता, यात्रुको चाप र प्रभावकारिताका आधारमा आगामी दिनमा थप व्यवस्थित गर्दै लैजाने तयारी गरिएको छ।
उद्घाटन कार्यक्रममा स्वास्थ्य क्षेत्रका प्रतिनिधिको सहभागिता
हेल्थ डेस्क उद्घाटन कार्यक्रममा नेशनल मेडिकल कलेजका एकेडेमिक डाइरेक्टर डा. रुबी श्रेष्ठ, एडमिशन अफेयर्स तथा मार्केटिङ डाइरेक्टर आबिद हुसेन अन्सारी, हस्पिटल डाइरेक्टर डा. ईशरत जहान लगायत कलेजका प्रशासनिक कर्मचारी, विमानस्थलका कर्मचारी, स्वास्थ्यकर्मी तथा सञ्चारकर्मीहरूको उपस्थिति रहेको थियो।
सिमरा विमानस्थलमा पहिलोपटक नियमित रूपमा निःशुल्क स्वास्थ्य सहायता उपलब्ध गराउने व्यवस्था सुरु भएपछि विमानस्थलको सेवा प्रणालीमा स्वास्थ्य सुरक्षाको पक्ष थप मजबुत हुने अपेक्षा गरिएको छ।
