पर्सा पोस्ट, बैशाख ०७ गते, काठमाडौं ।
बालेन्द्र शाहले विश्वविद्यालय तथा स्वास्थ्य शैक्षिक संस्थाहरूमा क्रियाशील दलीय विद्यार्थी र कर्मचारी संगठनका संरचनाहरू तत्काल हटाउन देशभरका उपकुलपतिहरूलाई कडा निर्देशन दिएका छन्।
प्रधानमन्त्री तथा मन्त्रिपरिषद्को कार्यालयमा सोमबार आयोजित करिब साढे तीन घण्टा लामो छलफलका क्रममा उनले शैक्षिक संस्थाहरूलाई राजनीतिक प्रभावबाट मुक्त राख्नुपर्नेमा जोड दिएका हुन्। उनले क्याम्पस, विद्यालय तथा अस्पतालजस्ता संस्थाहरूभित्र कुनै पनि बहानामा राजनीति गर्न नहुने स्पष्ट पारे।
प्रधानमन्त्री शाहले दलीय संगठन हटाउन कुनै पनि ऐनले अवरोध नगर्ने उल्लेख गर्दै उक्त निर्णय जुनसुकै हालतमा कार्यान्वयन गर्न निर्देशन दिएका छन्। उनले शैक्षिक तथा स्वास्थ्य संस्थाहरूलाई ‘पवित्र स्थल’ को रूपमा व्याख्या गर्दै त्यहाँ कुनै पनि राजनीतिक दलको प्रभाव, झण्डा वा संगठनलाई स्थान नदिइने बताएका छन्।
राजनीतिमा सक्रिय हुन चाहनेहरूले आफ्नो पेशागत जिम्मेवारीबाट अलग भएर पूर्ण रूपमा राजनीतिमा लाग्नुपर्ने सुझाव पनि उनले दिएका छन्।
छलफलका क्रममा धनेश्वर नेपालले विद्यार्थी संगठन हटाउने प्रयास गर्दा धम्की र आक्रमणसमेत सामना गर्नुपरेको भन्दै असुरक्षाको गुनासो गरेका थिए। त्यसप्रति प्रतिक्रिया दिँदै प्रधानमन्त्री शाहले संगठन हटाउने क्रममा कुनै सुरक्षा समस्या आए तुरुन्त सम्बन्धित मन्त्रालय वा आफ्नो सचिवालयमा जानकारी गराउन निर्देशन दिएका छन्।
उनले सरकार आवश्यक सुरक्षा व्यवस्था गर्न प्रतिबद्ध रहेको र प्रहरी प्रशासनले आफ्नो जिम्मेवारी प्रभावकारी रूपमा पूरा गर्ने विश्वास व्यक्त गरेका छन्।
यसैबीच, प्रधानमन्त्रीले उपकुलपतिहरूलाई ढुक्क भएर जिम्मेवारी निर्वाह गर्न आग्रह गर्दै शैक्षिक सुधारका लागि शैक्षिक क्यालेन्डर कडाइका साथ कार्यान्वयन गर्न तथा परीक्षा परिणाम एक महिनाभित्रै सार्वजनिक गर्नसमेत निर्देशन दिएका छन्।
सरकारले यस कदमलाई शैक्षिक संस्थाहरूलाई राजनीतिमुक्त बनाउँदै शैक्षिक गुणस्तर सुधार गर्ने प्रयासका रूपमा प्रस्तुत गरेको छ।
