पर्सा पोस्ट, जेष्ठ २६ गते, वीरगञ्ज ।
राष्ट्रिय स्वतन्त्र पार्टी (रास्वपा) पर्साको नयाँ जिल्ला नेतृत्व चयनका लागि सम्पन्न निर्वाचनमा सांसद हरि पन्त नेतृत्वको संस्थापन पक्षले एकलौटी जीत हासिल गरेको छ। निर्वाचनमा पन्त समूहका उम्मेदवारहरूले सबै प्रमुख पदमा विजय हासिल गर्दै संगठनभित्र आफ्नो प्रभाव मजबुत बनाएका छन्।
निर्वाचन समितिका संयोजक नन्दन यादवका अनुसार जिल्ला सभापति पदमा हरि पन्त १६६ मतसहित निर्वाचित भएका हुन्। उनका निकटतम प्रतिद्वन्द्वी सुशीलकुमार कानुले ११८ मत प्राप्त गरेका थिए। पन्तले ४८ मतको स्पष्ट अन्तरसहित जीत दर्ता गरेका हुन्।
उपसभापति पदमा पनि पन्त पक्षकै दिलीपकुमार कुर्मी विजयी भएका छन्। उनले १६२ मत प्राप्त गर्दा प्रतिस्पर्धी रंदीप श्रीवास्तव ११४ मतमा सीमित भए। त्यसैगरी सचिव पदमा सुदिशकुमार प्रजापति १६० मतसहित निर्वाचित भए भने उनका प्रतिद्वन्द्वी शिवकुमार साहले ११६ मत प्राप्त गरेका थिए।
सहसचिव पदमा कृष्णा पासवान १४९ मतसहित विजयी भए। उनका प्रतिस्पर्धी निरज कुमार साहले ११३ मत ल्याएका थिए।
सदस्य पदतर्फ तुलसा पौडेल अधिकारी १६० मतसहित सर्वाधिक मत प्राप्त गर्ने उम्मेदवार बनेकी छन्। सदस्यमा प्रियंका कुमारी कुर्मी, पूर्णबहादुर सापकोटा, कामोध्या चौधरी तथा शशीदेवी थरुनी पनि निर्वाचित भएका छन्।
निर्वाचनको अन्तिम परिणाम सार्वजनिक भएसँगै रास्वपा पर्साको नयाँ जिल्ला कार्यसमितिमा संस्थापन पक्षको पूर्ण वर्चस्व स्थापित भएको राजनीतिक वृत्तमा चर्चा सुरु भएको छ। एउटै प्यानलका उम्मेदवारहरूले सबै प्रमुख पदमा विजय हासिल गरेपछि हरि पन्त समूहले आगामी दिनमा संगठन सञ्चालनमा थप मजबुत भूमिका खेल्ने अनुमान गरिएको छ।
निर्वाचनपछि नवनिर्वाचित सभापति हरि पन्तले पार्टीलाई पर्साको गाउँ–गाउँसम्म विस्तार गर्ने, युवालाई संगठनमा जोड्ने तथा जनताका मुद्दालाई प्राथमिकताका साथ उठाउने प्रतिबद्धता व्यक्त गरेका छन्। उनले पार्टीभित्र सबै पक्षलाई समेटेर सहकार्य र एकताको वातावरण निर्माण गरिने बताएका छन्।
रास्वपा पर्साको नयाँ नेतृत्व चयनसँगै अब संगठन विस्तार, कार्यकर्ता व्यवस्थापन, जनसम्पर्क अभियान तथा आगामी निर्वाचन लक्षित कार्यक्रमलाई तीव्रता दिइने अपेक्षा गरिएको छ। राजनीतिक विश्लेषकहरूले भने पर्सामा रास्वपाको आगामी रणनीति र संगठनात्मक सक्रियता अब नयाँ नेतृत्वको कार्यशैलीमा निर्भर रहने बताएका छन्।
