पर्सा पोस्ट , जेष्ठ २६ गते , रक्सौल, पूर्वी चम्पारण ।
लायन्स क्लब अफ रक्सौलका अध्यक्ष तथा सामाजिक कार्यकर्ता, भारत विकास परिषद् रक्सौलका सेवा संयोजक एवं मिडिया इन्चार्ज बिमल सर्राफले जीवनमा सकारात्मक सोच, आत्मबोध र मानवीय व्यवहारको महत्त्वबारे आफ्नो विचार व्यक्त गरेका छन्। प्रेससँग कुराकानी गर्दै उनले मानिसले आफ्नो स्वभावअनुसार नै समाजमा व्यवहार र सन्देश बाँड्ने बताएका हुन्।
उनले प्रकृतिको नियमअनुसार हरेक व्यक्तिसँग जे हुन्छ, उसले त्यही कुरा समाजमा बाँड्ने उल्लेख गर्दै खुशी व्यक्तिले खुशी, दुःखी व्यक्तिले दुःख, बुद्धिमान व्यक्तिले ज्ञान र भ्रमित व्यक्तिले भ्रम फैलाउने बताए। “मानिसले समाजलाई के दिन्छ भन्ने कुरा उसको सोच, संस्कार र व्यवहारमा निर्भर हुन्छ,” उनले भने।
सर्राफले जीवनमा समस्या आउनु स्वाभाविक भएको उल्लेख गर्दै प्रत्येक समस्यासँग समाधान पनि जोडिएको बताए। कठिन परिस्थितिबाट समाधानतर्फ अघि बढ्न सक्ने क्षमता नै सफल व्यक्तिको पहिचान भएको उनको भनाइ थियो। उनले गल्ती स्वीकार गर्न नसक्ने व्यक्तिलाई चिन्न नसक्नु पनि कमजोरी हुन सक्ने धारणा राखे।
शिक्षा र बुद्धि फरक विषय भएको उल्लेख गर्दै उनले धेरै शिक्षित व्यक्ति व्यवहारिक रूपमा कमजोर हुन सक्ने र अशिक्षित व्यक्तिहरू पनि अत्यन्त बुद्धिमान हुन सक्ने बताए। “डिग्रीभन्दा व्यवहार र सोच ठूलो कुरा हो,” उनले स्पष्ट पारे।
उनले सकारात्मक सोच भएको व्यक्ति कहिल्यै एक्लो नहुने उल्लेख गर्दै अहंकारका कारण धेरै सम्बन्धहरू टुट्ने गरेको बताए। कतिपयले सम्बन्ध जोगाउने प्रयासमा आफ्नो आत्मसम्मान गुमाउने गरेको उनको भनाइ थियो।
जीवनमा संघर्ष र पीडाले नै मानिसको चरित्र बलियो बनाउने उल्लेख गर्दै उनले मनलाई नै सबैभन्दा ठूलो अदालतको संज्ञा दिए। “मानिसको मनले सधैं सही र गलत छुट्याउन सक्छ,” उनले भने।
उनले सफलता प्राप्त गर्न नयाँ काम गर्न सक्ने साहस आवश्यक पर्ने बताए। पैसाको अभावले मानिसलाई थकित बनाए पनि कठोर व्यवहारले मानिसलाई भित्रैदेखि तोड्ने उल्लेख गर्दै उनले मानवीय व्यवहारलाई जीवनको सबैभन्दा ठूलो सम्पत्ति बताए।
सूर्य बादलभित्र लुके पनि, सत्य दबिए पनि र कर्म बिर्सिएजस्तो देखिए पनि अन्ततः सत्यको नै विजय हुने उनको विश्वास थियो। उनले सबैलाई सधैं सकारात्मक, आशावादी र मानवताप्रति समर्पित भएर अघि बढ्न आग्रह गरेका छन्।
