पर्सा पोस्ट , जेष्ठ २४ गते , बारा ।
राष्ट्रिय स्वतन्त्र पार्टी (रास्वपा) बारा जिल्लाको प्रथम जिल्ला अधिवेशन नजिकिँदै जाँदा नेतृत्व चयनको गतिविधि तीव्र बन्दै गएको छ। अधिवेशनअन्तर्गत विभिन्न पदका लागि उम्मेदवारी घोषणा हुने क्रम जारी रहँदा युवा नेता सन्नी जैसवालले जिल्ला सचिव पदका लागि औपचारिक रूपमा उम्मेदवारी घोषणा गरेका छन्।
जैसवालले पार्टी संगठनलाई जिल्लाको सबै पालिकासम्म प्रभावकारी रूपमा विस्तार गर्दै युवाको सक्रिय सहभागिता बढाउने उद्देश्यसहित उम्मेदवारी दिएको बताएका छन्। उनले रास्वपाले अघि सारेका सुशासन, पारदर्शिता, जवाफदेहिता तथा जनउत्तरदायी राजनीतिक अभ्यासलाई बारा जिल्लामा थप मजबुत बनाउने प्रतिबद्धता व्यक्त गरेका छन्।
उम्मेदवारी घोषणा कार्यक्रममा बोल्दै जैसवालले पार्टीभित्र अनुशासित, सक्रिय र जिम्मेवार संगठन निर्माण आफ्नो प्रमुख प्राथमिकता रहेको उल्लेख गरे। उनले पार्टीका नीति, सिद्धान्त र जनअपेक्षाअनुसार संगठनलाई चलाउँदै जनसरोकारका विषयमा प्रभावकारी भूमिका निर्वाह गर्ने बताए।
उनका अनुसार बारा जिल्लामा संगठन विस्तार, सदस्यता वृद्धि, प्रशिक्षण कार्यक्रम सञ्चालन तथा गाउँ–टोलसम्म पार्टीको पहुँच विस्तार गर्न विशेष योजना अघि सारिनेछ। युवालाई राजनीति प्रति आकर्षित गर्दै उनीहरूको क्षमता विकास र नेतृत्व निर्माणमा आफूले विशेष ध्यान दिने उनले बताए।
जैसवालले पार्टीका प्रतिनिधि, सदस्य तथा शुभेच्छुकहरूसँग सहयोग, समर्थन र विश्वासको अपेक्षा गर्दै लोकतान्त्रिक प्रक्रियामार्फत सक्षम नेतृत्व चयन हुने विश्वास व्यक्त गरे। उनले अधिवेशनलाई संगठन सुदृढीकरण र नयाँ ऊर्जा सहितको नेतृत्व चयन गर्ने महत्वपूर्ण अवसरका रूपमा लिनुपर्ने धारणा राखे।
रास्वपा बारा जिल्ला अधिवेशनबाट जिल्ला सभापति, उपसभापति, सचिव, सहसचिव लगायत विभिन्न पदाधिकारीसहित नयाँ जिल्ला कार्यसमिति चयन गरिने जनाइएको छ। अधिवेशनमा विभिन्न पदमा प्रतिस्पर्धा हुने सम्भावना रहेकाले जिल्लाभर पार्टी कार्यकर्ता तथा प्रतिनिधिहरूबीच उत्साह बढेको देखिएको छ।
पार्टीका नेताहरूले अधिवेशनलाई संगठन विस्तार, आन्तरिक लोकतन्त्रको अभ्यास तथा जनविश्वास अझ मजबुत बनाउने अवसरका रूपमा व्याख्या गरेका छन्। निर्वाचन प्रक्रियाबाट चयन हुने नयाँ नेतृत्वले पार्टीलाई जिल्लामा थप सशक्त बनाउने अपेक्षा गरिएको छ।
