पर्सा पोस्ट , माघ २८ गते , वीरगञ्ज ।
राष्ट्रिय स्वतन्त्र पार्टी (रास्वपा) पर्सा क्षेत्र नं. १ का उम्मेदवार हरि पन्तले चुनावी प्रचार अभियानलाई तीव्र बनाएका छन्। चुनाव नजिकिँदै जाँदा उनले विभिन्न वडामा घरदैलो तथा जनसम्पर्क कार्यक्रमलाई निरन्तरता दिएका हुन्।
यसै क्रममा पन्तले आज वीरगञ्ज महानगरपालिका अन्तर्गत सुखचैनामा मतदाता भेटघाट तथा जनसम्पर्क कार्यक्रम सम्पन्न गरेका छन्। कार्यक्रममा स्थानीय बासिन्दाहरूको उल्लेखनीय उपस्थिति देखिएको थियो। मतदाताहरूले आफ्ना समस्या, विकासका आवश्यकता तथा स्थानीय सरोकारका विषयहरू उम्मेदवारसमक्ष राखेका थिए।
भेटघाटका क्रममा पन्तले आफू निर्वाचित भए सुशासन, पारदर्शिता र जनमुखी विकासलाई प्राथमिकतामा राख्ने प्रतिबद्धता व्यक्त गरे। उनले शिक्षा, स्वास्थ्य, खानेपानी, सडक पूर्वाधार तथा रोजगारी सिर्जना मुख्य एजेन्डा रहेको बताउँदै “जनताको अपेक्षा अनुसार काम गर्ने र भ्रष्टाचारमुक्त प्रशासन कायम गर्ने” आफ्नो लक्ष्य रहेको उल्लेख गरे।
घरदैलो अभियानमा स्थानीय युवा, व्यापारी तथा विभिन्न पेशाकर्मीहरूको सक्रिय सहभागिता देखिएको र मतदाताहरूले सकारात्मक प्रतिक्रिया दिएको रास्वपा कार्यकर्ताहरूले बताएका छन्।
यसैबीच, काठमाडौं महानगरपालिकाका पूर्व मेयर बालेन्द्र (बालेन) शाहको वीरगञ्ज आगमनको चर्चा बढ्दै जाँदा यहाँको राजनीतिक माहोल थप चासोपूर्ण बनेको छ। बालेन शाह वीरगञ्ज आउने तयारीमा रहेको जानकारी बाहिरिएपछि समर्थक तथा युवावर्गमा विशेष उत्साह देखिएको छ।
उम्मेदवार पन्तले आगामी दिनहरूमा पनि क्षेत्रका अन्य वडाहरूमा घरदैलो तथा मतदाता भेटघाट कार्यक्रमलाई निरन्तरता दिने बताएका छन्। चुनावी गतिविधि बढेसँगै वीरगञ्जमा राजनीतिक चहलपहल समेत तीव्र बन्दै गएको छ।
