पर्सा पोस्ट, माघ २३ गते, बिरगंज ।
पर्सा जिल्ला निर्वाचन क्षेत्र नम्बर–२ अन्तर्गत जनता समाजवादी पार्टी (जसपा) का प्रतिनिधिसभा सदस्य उम्मेदवार अशोक कुमार टेमानीले आज घरदैलो कार्यक्रम अन्तर्गत पर्सागढी नगरपालिका वडा नं. ३ को बिरुवा टोलमा मतदातासँग प्रत्यक्ष भेटघाट गर्नुभएको छ ।
घरदैलो अभियानका क्रममा स्थानीय युवा तथा बासिन्दाहरूले उम्मेदवार टेमानीको भव्य एवं उत्साहपूर्ण स्वागत गरेका थिए। युवाहरूले फूलमाला, नाराबाजी र आत्मीय अभिवादनसहित स्वागत गर्दै आगामी निर्वाचनमा विजय हासिल गर्न आशीर्वाद समेत दिएका थिए। स्थानीयस्तरमा परिवर्तनको अपेक्षा गर्दै युवाहरूले टेमानीप्रति भरोसा व्यक्त गरेका हुन्।
कार्यक्रमका क्रममा उम्मेदवार टेमानीले स्थानीयवासीहरूसँग प्रत्यक्ष संवाद गर्दै उनीहरूका समस्या, आवश्यकता र अपेक्षाहरू ध्यानपूर्वक सुन्नुभएको थियो। उहाँले क्षेत्रको समग्र विकास, रोजगारी सिर्जना, गुणस्तरीय शिक्षा, सुलभ स्वास्थ्य सेवा तथा युवाको भविष्य सुरक्षित बनाउने विषयलाई आफ्नो प्रमुख प्राथमिकता रहेको बताउनुभयो।
“जनताको भावना र आवाजलाई संसदसम्म पुर्याउनु मेरो मुख्य दायित्व हो,” भन्दै टेमानीले यस निर्वाचनलाई परिवर्तनको महत्वपूर्ण अवसरका रूपमा लिन मतदातासँग आग्रह गर्नुभयो।
स्थानीय युवाहरूले टेमानीलाई सरल, जनमुखी र विकासप्रति प्रतिबद्ध नेता भएको टिप्पणी गर्दै आगामी निर्वाचनमा पूर्ण समर्थन जनाउने संकेत गरेका छन्। घरदैलो कार्यक्रमसँगै पर्सा–२ मा जसपाको चुनावी गतिविधि थप सक्रिय र प्रभावशाली बन्दै गएको देखिएको छ।
चुनाव नजिकिँदै जाँदा उम्मेदवार टेमानीको जनसम्पर्क अभियान तीव्र बन्दै गएको छ भने स्थानीयस्तरमा उहाँप्रतिको आकर्षण, विश्वास र समर्थन क्रमशः बढ्दै गएको जनाइएको छ।
