पर्सा पोस्ट, बैशाख ०७ गते, वीरगञ्ज ।
पर्साको जगरनाथपुर गाउँपालिका–५ मा एक विपन्न परिवारको बिहेवारीलाई लक्षित गर्दै खाद्यान्न सामग्री सहयोग गरिएको छ। सामाजिक उत्तरदायित्व अन्तर्गत गरिएको उक्त सहयोगले स्थानीय स्तरमा मानवीय संवेदनाको उदाहरण प्रस्तुत गरेको छ।
युवा नेता एवं समाजसेवी बृजेश्वर प्रसाद चौधरीको पहलमा राष्ट्रिय स्वतन्त्र पार्टी (रास्वपा) निकट युवा नेता तथा समाजसेवी सन्तोष कुमारले उक्त परिवारलाई आवश्यक खाद्यान्न सामग्री प्रदान गरेका हुन्। सहयोग स्वरूप १ बोरा चिउरा, २ बोरा चामल, १ बोरा आलु तथा १ प्याकेट प्याज गरी कूल ४ बोरा खाद्यान्न सामग्री हस्तान्तरण गरिएको जनाइएको छ।
सहयोग सामग्री संकलनदेखि लिएर सम्बन्धित परिवारको घरसम्म पुर्याउने कार्यसमेत स्वयंसेवी रूपमा गरिएको थियो। स्थानीयका अनुसार यसले सहयोगलाई छिटो, सहज र प्रभावकारी बनाउन महत्वपूर्ण भूमिका खेलेको छ।
आर्थिक अभावका कारण बिहेवारी व्यवस्थापनमा कठिनाइ भोगिरहेको परिवारका लागि उक्त सहयोग निकै महत्वपूर्ण सावित भएको छ। सहयोग प्राप्त गरेपछि परिवारजनले खुशी व्यक्त गर्दै सहयोगीहरूप्रति आभार प्रकट गरेका छन्।
कार्यक्रममा सहभागी स्थानीय अगुवाहरूले यस्ता सामाजिक अभियानहरूले समाजमा सकारात्मक सन्देश प्रवाह गर्ने र अन्य व्यक्तिहरूलाई पनि सहयोगी भावनामा प्रेरित गर्ने विश्वास व्यक्त गरे। उनीहरूले आगामी दिनहरूमा पनि यस्ता मानवीय तथा सहयोगमूलक कार्यहरूलाई निरन्तरता दिनुपर्नेमा जोड दिएका छन्।
स्थानीय तहमा पछिल्ला दिनहरूमा यस्ता सहयोगी अभियानहरू बढ्दै जानु सामाजिक एकता र सहकार्यको दृष्टिकोणले सकारात्मक संकेतका रूपमा हेरिएको छ।
