पर्सा पोस्ट, चैत २७ गते, वीरगञ्ज ।
नेपाल फोटो पत्रकार महासंघ, पर्सा कार्यसमितिले हालै केन्द्रीय सदस्यमा निर्वाचित भएका राहुल गुप्तालाई एक विशेष कार्यक्रमका बीच सम्मान गरेको छ। गुप्ता नेपाल पत्रकार महासंघ पर्साका कार्यसमिति सदस्यसमेत रहेका छन्।
हालै सम्पन्न निर्वाचनबाट महासंघको केन्द्रीय सदस्यमा निर्वाचित भएपछि पर्सा कार्यसमितिले उनको योगदान र सफलताको कदर गर्दै सम्मान कार्यक्रम आयोजना गरेको हो। कार्यक्रममा समितिका अध्यक्ष सफल खतिवडा, कोषाध्यक्ष शम्भु सुमन, पूर्व सचिव तिवारी यादव, कार्यसमिति सदस्य आरोहण साहलगायत पत्रकार तथा सरोकारवालाहरूको उल्लेखनीय उपस्थिति रहेको थियो।
कार्यक्रममा बोल्दै अध्यक्ष सफल खतिवडाले राहुल गुप्ताको निर्वाचनले पर्सा जिल्लाको पहिचान राष्ट्रिय स्तरमा थप मजबुत भएको बताए। उनले गुप्ताको नेतृत्वदक्षता, अनुभव र सक्रियताले फोटो पत्रकारिताको क्षेत्रमा नयाँ ऊर्जा थप्ने विश्वास व्यक्त गरे। साथै, पर्सा कार्यसमिति सधैं सहकार्य र आवश्यक समर्थनका लागि तयार रहने प्रतिबद्धता जनाए।
उपस्थित वक्ताहरूले गुप्ताको सफलता पर्सा जिल्लाका लागि गर्वको विषय भएको उल्लेख गर्दै यस उपलब्धिले युवा पत्रकारहरूलाई थप प्रेरणा मिल्ने धारणा राखे। उनीहरूले पत्रकारितामा निरन्तर मेहनत र इमान्दारिताले ठूलो उपलब्धि हासिल गर्न सकिने सन्देशसमेत दिएका थिए।
सम्मानित व्यक्तित्व राहुल गुप्ताले आफूलाई गरिएको सम्मानप्रति हार्दिक आभार व्यक्त गर्दै फोटो पत्रकारहरूको पेशागत हकहित संरक्षण, क्षमता अभिवृद्धि तथा संस्थागत सुदृढीकरणमा सक्रिय रहने प्रतिबद्धता जनाए। उनले देशभरका फोटो पत्रकारहरूको आवाजलाई सशक्त बनाउँदै संगठनलाई अझ प्रभावकारी, समावेशी र गतिशील बनाउने आफ्नो प्राथमिकता रहेको बताए।
कार्यक्रम सौहार्दपूर्ण वातावरणमा सम्पन्न भएको थियो।
