पर्सा पोस्ट, पौष २८ गते, रक्सौल ।
पौष महिनाको कडा चिसोलाई ध्यानमा राख्दै लायन्स क्लब रक्सौलले ५० जना गरिब, असहाय तथा अशक्त व्यक्तिहरूलाई चिसोबाट जोगाउन न्यानो कम्बल वितरण गरेको छ। हिजो राति क्लबका अध्यक्ष लायन बिमल कुमार सराफको नेतृत्वमा क्लब सचिव लायन मोहम्मद निजामुद्दीनले सिटी स्टेशन रोड, बाटा चौक तथा उप–डिभिजनल अस्पताल आसपासका क्षेत्रमा चिसोमा काम गरिरहेका तथा आश्रयविहीन व्यक्तिहरूलाई कम्बल वितरण गरेका हुन्।
कम्बल वितरण कार्यक्रमलाई सम्बोधन गर्दै अध्यक्ष लायन बिमल कुमार सराफले लायन्स इन्टरनेशनलले आफ्ना परोपकारी सदस्यहरू मार्फत निरन्तर सेवा कार्य गर्दै आएको बताए। उनले लायन्स इन्टरनेशनलका संस्थापक लायन मेल्भिन जोन्सको जन्मदिनको अवसरमा विश्वभर एक महिनासम्म सेवा तथा सामाजिक कार्यक्रमहरू आयोजना गरिने जानकारी पनि दिए।
कार्यक्रममा क्लब सचिव लायन मोहम्मद निजामुद्दीनले प्राकृतिक प्रकोप होस् वा अन्य मानवीय सेवा कार्य, यस्ता महान् कार्यमा निरन्तर लागिरहेको संस्थाको सदस्य हुन पाउँदा गर्व महसुस भएको बताए। उनले लायन्स क्लब रक्सौलले समय–समयमा कम्बल वितरण, नि:शुल्क स्वास्थ्य जाँच तथा औषधि वितरण, साथै गरिब तथा असहाय वर्गका लागि सचेतनामूलक कार्यक्रमहरू सञ्चालन गर्दै आएको उल्लेख गरे।
यस्ता सेवा कार्यक्रमहरूले मानव सेवा नै ईश्वर सेवा हो भन्ने अनुभूति गराउने बताउँदै उनले कम्बल वितरणबाट गरिब तथा असहाय व्यक्तिहरूले चिसो मौसममा आफूलाई जोगाउन सहयोग पाउने र संस्थाप्रति आशिष् तथा सद्भाव बढ्ने विश्वास व्यक्त गरे।
कम्बल वितरण कार्यक्रममा लायन शम्भु प्रसाद चौरसिया, लायन गणेश धनोठिया, लायन संजय गुप्ता, लायन डा. सुशील सिंह, लायन राजु गुप्ता, लायन नारायण रुंगटा, लायन पंकज बरनवाल, लायन बसन्त जालान, लायन सुमित भारतीय तथा लायन डा. प्रदीप कुमारको उल्लेखनीय योगदान रहेको थियो।
