पर्सा पोस्ट, भदौ ११ गते, बीरगंज । बीरगंज महानगरपालिकामा हैजा र लामखुट्टे नियन्त्रणका लागि आजदेखि युद्धस्तरको औषधि छर्कने अभियान सुरु गरिएको छ ।
महानगर प्रमुख राजेशमान सिंहको विशेष निर्देशनमा सुरु गरिएको उक्त अभियान महानगरपालिकाका सबै ३२ वटै वडामा एकैपटक सञ्चालन गरिने भएको छ ।
अभियानलाई प्रभावकारी बनाउन महानगरका सरसफाइ तथा हरियाली संयोजक जयप्रकाश खेतानको नेतृत्वमा पाँचवटा गाडी र २० जनाको प्राविधिक तथा जनशक्ति परिचालन गरिएको छ ।
संयोजक खेतानले “हाम्रो लक्ष्य केवल सरसफाइ मात्र होइन, स्वस्थ र सुरक्षित बीरगंज निर्माण गर्नु पनि हो” भन्दै महानगरको जिम्मेवारीप्रति प्रतिबद्धता व्यक्त गरे ।
यस्तै, मेयर सिंहले हाल फैलिएको हैजा र लामखुट्टेको समस्या न्यूनीकरण गर्न यो अभियान महत्वपूर्ण हुने विश्वास व्यक्त गर्दै जनताले छिट्टै यसको सकारात्मक परिणाम अनुभव गर्ने बताउनुभयो । यससँगै बीरगंज महानगरले सरसफाइ, जनचेतना र रोग नियन्त्रणलाई निरन्तर प्राथमिकतामा राख्ने जनाएको छ ।
