अजित कुमार भुजेल , बिरगंज । बिरगंज महानगरपालिकाका प्रमुख राजेशमान सिंहले सिमलताल पहिरोमा परी बेपत्ता भएका एन्जल बसका चालक वीरगंज वडा न.१६ निवासी जवाहिर महतोका बच्चालाई भेट गर्दै उनीहरुको निशुल्क पठनपाठनको व्यवस्था मिलाउनु भएको छ ।
प्रमुख सिंहले सोही वडा नं. १६ नगवा स्थित सनलाइट मा.वि. मा दुबै जना बालकहरुको निशुल्क अध्ययन गर्ने व्यवस्था मिलाउन लगाउनु भएको हो । श्याम कुशवाह कक्षा ४ र बिट्टु कुशवाह UKG मा अध्ययन गरिरहेका छन्।
सनलाइट मा.वि.का प्रधानाध्यापक आलोक चौरसियाले महानगर प्रमुखको आग्रहमा बालकहरुलाई कक्षा १२ सम्म निशुल्क अध्ययन गर्ने व्यवस्था मिलाएको जानकारी दिनुभयो ।
बिरगंजबाट काठमाडौंतर्फ जाँदै गरेको बागमती प्रदेश–०३–००६ ख १५१६ नम्बरको एन्जल डिलक्स बस र काठमाडौंबाट गौरतर्फ आउँदै गरेको बागमती प्रदेश–०३–००१ ख २४९५ नम्बरको गणपति डिलक्स बसलाई गएको असार २८ गते नारायणगढ मुग्लिन सडक खण्ड अन्तर्गत चितवनको सिमलतालमा पहिरोले बगाएर त्रिशूली नदीमा खसेको थियो ।
