अजित कुमार भुजेल , बिरगंज । बारामा सवारी चालक अनुमति पत्र (लाइसेन्स) को लागि प्रयोगात्मक परीक्षा अर्थात ट्रायल सेन्टर आजदेखी संचालनमा आएकोे छ ।
शनिबार कलैया उपमाहनगरपालिका वाड नम्बर ३ गंगापुरमा रहेका वर्षा ड्राइभिङ्ग एण्ड ट्रेनिङ्ग सेन्टरको मधेश प्रदेशका मुख्यमन्त्री सरोज यादवले उद्धाटन गरेका थिए ।
प्रदेश सरकार आएपछि हरेक जिल्लाबाट लाइसेन्स जारी गर्ने कार्यको पनि सुरुवात गरिएको मुख्यमन्त्री यादवले बताए ।
यातायात व्यवस्था कार्यालय बाराले चैत्र महिनाको पहिलो साता लाइसेन्सको लिखित परीक्षा सञ्चालन हुने भएकोले आज शनिबार ट्रायल सेन्टर उद्धाटन गरिएको हो ।
यसभन्दा अगाडि सवारी चालक अनुमति पत्र नवीकरण, सवारी दर्ता (ब्लुबुक) नविकरण सेवाहरु बारा यातायात व्यवस्था कार्यालयले गर्दै आएको थियो ।
अब निर्माण भएको ट्रायल सेन्टरबाट लाइसेन्स वितरण गर्ने प्रयोगात्मक परीक्षा अर्थात ट्रायल लिने बारा यातायात व्यवस्था सेवा कार्यालयले जनाएको छ । उद्धाटन भएको ट्रायल सेन्टरमा चैत्र ५ गतेदेखी लिखित तथा प्रयोगात्मक परीक्षा संचालन हुने छ । ट्रेनिङ्ग सेन्टरका अध्यक्ष रामकुमार पटेलको अध्यक्षतामा भएको उद्धाटन कार्यक्रमा बिभिन्न राजनिति दालका प्रतिनिधिहरुको उपस्थिति रहेको थियो ।
