अजित कुमार भुजेल ,बिरगंज बिरगंजको सुनचादी पसलमा राजस्व अनुसन्धान पथलैयाले छापा मारेको छ।
बिरगंज महानगर पालिका वडा न. ६ स्थित माईस्थान २ नम्बर रोडमा रहेको आर.के. एण्ड सन्स सुनचाँदी पसलमा राजस्व अनुसन्धान कार्यालय पथलैया बाराको टोलीले आज दिउसो २:३० बजेतिर छापा मारेको थियो ।
सो सुनचाँदी पसलमा छापा मारेको राजस्व अनुसन्धान कार्यालय पथलैयाका प्रमुख प्रेम प्रसाद देवकोटाले जानकारी दिनुभयो।
आर.के.एण्ड सन्स सुनचाँदी पसलको बारेमा धेरै सूचनाहरु आएपछि अनुसन्धानका लागि आज आएको टोलीले पसलमा रहेको कागजपत्र लिएर फर्किएको राजस्व अनुसन्धान कार्यालय पथलैयाका प्रमुख देवकोटाले बताए ।
थप जानकारी भने अनुसन्धानपछि मात्रै आउने उनले बताए । बा २ झ १४३५ नम्बरको स्कारपियोमा आएको राजस्व अनुसन्धान कार्यालय पथलैयाको टोलीले एकबोरा कागजपत्र लिएर गएको प्रत्यक्षदर्शीले बताएका छन् ।
सुन तस्करीका घटनामा बारा, पर्साका सुनचाँदी व्यावसायीहरुको पनि संलग्नता रहेको सञ्चार माध्यमहरुमा आउने गरेकोले केही सूचना पाएर नै राजस्व अनुसन्धानको टोलीले छापामारेको हुनसक्ने अनुमान गरिएको छ ।
