पर्सा पोस्ट , साउन ०३ गते , रक्सौल, पूर्वी चम्पारण ।
“B” ले “जन्म” र “D” ले “मृत्यु” को अर्थ दिन्छ। यी दुवै कुरा मानिसको नियन्त्रणभन्दा बाहिर छन्, तर “B” र “D” को बीचमा आउने “C” अर्थात् “छनौट” भने मानिसकै हातमा रहने भएकाले जीवनलाई कसरी अगाडि बढाउने भन्ने निर्णय स्वयं व्यक्तिले गर्नुपर्ने सामाजिक कार्यकर्ता बिमल सराफले बताएका छन्।
लायन्स क्लब अफ रक्सौलका अध्यक्षसँग मिडिया इन्चार्ज तथा भारत विकास परिषद्, रक्सौलका सेवा संयोजकसँग मिडिया इन्चार्जको जिम्मेवारी सम्हालिरहेका सराफले प्रेससँग कुरा गर्दै सकारात्मक सोच, आत्मपरिवर्तन र वर्तमानमा बाँच्ने कलाले नै जीवनलाई सफल बनाउने धारणा व्यक्त गरे।
उनले विगतका दुःखद घटनालाई बोकेर बस्नु भन्दा वर्तमानलाई खुसीसाथ जिउन र भविष्यलाई प्रकृतिको जिम्मामा छोड्नुपर्ने बताए। “केही समस्याहरू समयसँगै आफैं समाधान हुन्छन्, तर हामी अनावश्यक प्रतिक्रिया दिएर तिनलाई झन् ठूलो बनाउँछौं,” उनले भने।
सराफका अनुसार चिन्ताले शरीर मात्र होइन, मनलाई पनि बिस्तारै कमजोर बनाउने गर्दछ। त्यसैले निराशामा समय बिताउनु भन्दा आजको दिनलाई राम्रो कार्यमा प्रयोग गरेर भोलिलाई उज्यालो बनाउनुपर्नेमा उनले जोड दिए।
उनले शब्दको सही प्रयोगले सम्बन्ध बलियो बन्ने उल्लेख गर्दै शब्द स्वतन्त्र भए पनि त्यसको छनोटले सम्मान वा अपमान दुवै दिलाउन सक्ने बताए। “सफलता राम्रो विचारबाट आउँछ, र राम्रो विचार असल मानिसहरूसँगको संगतबाट प्राप्त हुन्छ,” उनले बताए।
संघर्ष र मेहनतबिना सफलता सम्भव नभएको उल्लेख गर्दै उनले संघर्षको बाटोमा निरन्तर अघि बढ्ने व्यक्तिहरूले नै समाज परिवर्तन गर्न सक्ने धारणा राखे। साथै, परमेश्वरप्रति समर्पण र आध्यात्मिक चेतनाले मानिसको जीवनलाई सकारात्मक दिशातर्फ डोर्याउने उनले बताए।
जीवनमा शान्ति प्राप्त गर्न अरूलाई दोष दिने प्रवृत्तिभन्दा आफूलाई सुधार्ने संस्कार आवश्यक रहेको बताउँदै उनले “सम्पूर्ण संसारलाई कार्पेट गर्नु भन्दा चप्पल लगाउन सजिलो हुन्छ” भन्ने उदाहरण प्रस्तुत गरे।
उनले आधुनिक समाजमा सम्बन्ध र अपनत्वको परिभाषा बदलिँदै गएको उल्लेख गर्दै मानिसले आफ्नै मानिसहरूसँग आत्मीयता र विश्वास खोज्ने प्रवृत्ति अझै कायम रहेको बताए।
सराफका यी विचारहरूले वर्तमान समाजमा सकारात्मक सोच, नैतिकता, आत्मचेतना तथा मानव सम्बन्धको महत्वलाई पुनः उजागर गरेको स्थानीयवासीहरूले बताएका छन्।
