पर्सा पोस्ट , असार ०३ गते , रक्सौल, पूर्वी चम्पारण ।
जीवनमा सकारात्मक सोच, आत्मसमर्पण र वर्तमान क्षणलाई आत्मसात गर्दै अघि बढ्नुपर्ने सन्देशसहित सामाजिक कार्यकर्ता तथा भारत विकास परिषद् रक्सौलका सेवा संयोजक एवं मिडिया इन्चार्ज बिमल सराफले आफ्ना विचार सार्वजनिक गरेका छन्। लायन्स क्लब अफ रक्सौलका अध्यक्षसँगको भेटघाटका क्रममा प्रेससँग कुरा गर्दै सराफले जीवनको वास्तविक अर्थ, संघर्ष, सफलता र आत्मशान्तिबारे प्रेरणादायी भनाइ व्यक्त गरेका हुन्।
उनले “B” ले “Birth (जन्म)” र “D” ले “Death (मृत्यु)” जनाउने उल्लेख गर्दै यी दुवै कुरा मानिसको नियन्त्रण बाहिर रहेको बताए। तर “B” र “D” को बीचमा आउने “C” अर्थात् “Choice (छनौट)” भने मानिसकै हातमा हुने भएकाले जीवनलाई कसरी जिउने भन्ने निर्णय स्वयं व्यक्तिले गर्नुपर्ने धारणा राखे।
सराफले वर्तमानलाई खुशीसाथ स्वीकार गर्न, विगतका दुःखद क्षणहरूलाई बिर्सन र भविष्यलाई प्रकृतिको भरोसामा छोड्न सुझाव दिए। “वर्तमान क्षणमा बाँच्नु नै बाँच्ने कला हो,” उनले भने, “धेरै समस्याहरू समयसँगै आफैं समाधान हुन्छन्, तर हामी अनावश्यक प्रतिक्रिया दिएर तिनलाई झन् जटिल बनाउँछौं।”
उनले चिन्ता र नकारात्मक सोचले शरीरसँगै मनलाई पनि बिस्तारै कमजोर बनाउने उल्लेख गर्दै आजको दिनलाई सकारात्मक कार्यमा प्रयोग गर्नुपर्ने बताए। “आज केही नगरी अनिश्चित भोलिको चिन्ता गर्नु भन्दा आज राम्रो काम गरेर भोलिलाई उज्यालो बनाउनु बुद्धिमानी हो,” उनले भने।
उनका अनुसार शब्दहरू स्वतन्त्र भए पनि तिनको छनौटले सम्बन्ध निर्माण वा विघटन गर्न सक्छ। “सफलता सधैं राम्रो विचारबाट आउँछ, र राम्रो विचार असल मानिसहरूसँगको संगतबाट जन्मिन्छ,” उनले थपे।
संघर्ष र मेहनतको महत्त्वबारे चर्चा गर्दै सराफले संघर्षको बाटोमा हिँड्नेहरूले मात्र समाज परिवर्तन गर्न सक्ने बताए। “रातसँग लड्न सक्नेहरू मात्र सूर्यझैं चम्किन्छन्,” उनले प्रेरणादायी शैलीमा भने।
उनले आध्यात्मिक चेतना र परमेश्वरप्रतिको समर्पणले जीवनलाई नयाँ उचाइमा पुर्याउने विश्वास व्यक्त गरे। “जब मानिस परमेश्वरको सामु बच्चा बन्छ, तब उहाँको प्रेम र मार्गदर्शनले जीवन उज्यालो बनाउँछ,” उनले बताए।
शान्तिपूर्ण जीवनका लागि अरूको आलोचना गर्नु भन्दा आफूलाई परिवर्तन गर्नुपर्नेमा जोड दिँदै उनले उदाहरण दिए, “सम्पूर्ण संसारमा कार्पेट बिछ्याउनु भन्दा आफ्ना खुट्टामा चप्पल लगाउनु सजिलो हुन्छ।”
कार्यक्रममा सहभागीहरूले सराफका विचारलाई प्रेरणादायी र समाजमा सकारात्मक ऊर्जा फैलाउने खालको भएको प्रतिक्रिया दिएका थिए। सामाजिक, आध्यात्मिक तथा मानवीय चेतनासम्बन्धी यस्ता विचारले युवापुस्तामा सकारात्मक सोच र आत्मविश्वास अभिवृद्धि गर्न सहयोग पुग्ने विश्वास व्यक्त गरिएको थियो।
