अजित कुमार भुजेल , बिरगंज । दिपावलीको अवसर पारेर बिरगंजमा पुनः ‘रात्रि बजार’ सञ्चालन गरिने भएको छ । बिरगंज महानगरपालिकाले आदर्शनगर चोकदेखि भाजुरत्न चोकसम्म
सोमबारदेखि ‘रात्रि बजार’ सञ्चालन गर्ने तयारी गरेको हो ।
सोमबारदेखि बिहीबारसम्म दिपावली लक्षित रात्रि बजार सञ्चालन गर्न लागिएको बिरगंज महानगरका मेयर राजेशमान सिंहले जानकारी दिए ।
बिरगंजको अर्थतन्त्र चलायमान बनाउन र अबेरसम्म बजार सञ्चालन हुने वातावरण बनाउन रात्रि बजारले भूमिका निर्वाह गर्ने उहाँको विश्वास छ ।
वीरगंज महानगरपालिका र ग्रीनसिटी सामुदायिक प्रहरी सेवा केन्द्रको संयुक्त आयोजनामा हुन लागेको रात्रि बजारमा खानाका विशेष परिकार, लत्ताकपडा, कस्मेटिक, भाडाँकुडा लगायतका सरसामानका स्टल राखिनेछ ।
यसका साथै नेपाली सांस्कृतिक परम्परा झल्कने झाकीको प्रस्तुतीका साथै दिपावली र छठ पर्वको शुभकामना आदानप्रदान गर्ने कार्यक्रम समेत आयोजना हुने छ ।
