अजित कुमार भुजेल , नेपालगन्ज । नक्कली औषधी बिक्री गर्ने पसल बन्द गरिएको छ । अनुगमनका क्रममा त्यस्तो भेटिएपछि पसल बन्द गरिएको हो । पसल र बिक्रेता दुवै नक्कली भएको पाइएपछि पसल बन्द गरेर बिक्रेतालाई पक्राउ गरिएको छ ।
अनुगमनको क्रममा डुडुवा गाउँपालिकाको वडा ६ चौधरीपूर्वाबाट एक जना नक्कली औषधी बिक्रेतालाई प्रशासनले पक्राउ गरी नक्कली औषधी पसल बन्द गरेको हो ।
औषधी पसल सञ्चालन गर्ने कुनै पनि कागजपत्र र अनुमति नलिई लामो समयदेखि नक्कली औषधी पसल गर्दै आएका विकास लखेरलाई नियन्त्रणमा लिँदै बाँके प्रशासनले लखेरले चलाउँदै आएको औषधी पसललाई सिलबन्दी गरेको बाँकेका प्रमुख जिल्ला अधिकारी श्रवण कुमार पोखरेलले बताउनुभयो ।
प्रमुख जिल्ला अधिकारी पोखरेलका अनुसार लखेरसँग औषधी बिक्री गर्ने योग्यताको प्रमाणपत्र नभएको, पसल प्रचलित कानुनअनुसार कहिँकतै दर्ता समेत नभएको हुँदा पसल र बिक्रेता दुवै नक्कली भएको पुष्टि भएको जनाइएको छ ।
औषधी जस्तो अति नै संवेदनशील बस्तुको सो नक्कली पसलमा रहेका ७५ प्रतिशत भन्दा बढी औषधी म्याद नाघेको फेला परेको जनाउँदै प्रजिअ पोखरेलले कतिपय औषधीमा आफैले कलमबाट म्याद सच्याइएको पाइएको बताउनुभयो ।
उहाँले बरामद भएका केही औषधी नेपालमा प्रतिबन्धित समेत रहेको जनाउँदै लखेरले मानिसको जीवनसँग खेलबाड गरिरहेको पाइएको उहाँले बताउनुभयो ।
नक्कली पसलमा नेपालमा उपयोग गर्न समेत निषेध गरिएका भिगो ट्रिप्पल एक्स, डर्मिकेम जस्ता औषधी सो पसलबाट बरामद भएको जिल्ला प्रशासन कार्यालय बाँकेले जनाएको छ ।
औषधी व्यवस्था विभाग शाखा कार्यालय नेपालगन्जसँग समन्वय गरी नक्कली बिक्रेता लखेरलाई औषधी बिक्री वितरण सम्बन्धी प्रचलित कानुन बमोजिम कारबाही गरिने प्रमुख जिल्ला अधिकारी पोखरेलले बताउनुभयो ।
Source. Gorkhapatra Online
