पर्सा पोस्ट, चैत २२ गते, वीरगञ्ज।
वीरगञ्ज महानगरपालिका–छपकैया–२ स्थित सामुदायिक प्रहरी सेवा केन्द्रमा शुद्ध खानेपानीको सुविधा विस्तार गरिएको छ। केन्द्रमा आउने सेवाग्राही, आम सर्वसाधारण तथा सुरक्षाकर्मीहरूको सहजताका लागि १०० लिटर क्षमताको आरओ (RO) वाटर फिल्टर कूलर जडान गरिएको हो।
उक्त उपकरण सामुदायिक प्रहरी सेवा केन्द्र छपकैया–२ का अध्यक्ष हाजी ग्यासुद्दिन ठाकुराइको पहलमा Rungta Welfare Society का प्रतिनिधि सुरेश रुंगटाको पूर्ण सहयोगमा उपलब्ध गराइएको केन्द्रले जनाएको छ। यस सहकार्यले स्थानीय स्तरमा सार्वजनिक सेवाको गुणस्तर सुधार गर्न महत्वपूर्ण योगदान पुर्याएको जनाइएको छ।
केन्द्रका अध्यक्ष हाजी ग्यासुद्दिन ठाकुराइले सेवाग्राही तथा सुरक्षाकर्मीहरूको आधारभूत आवश्यकतालाई मध्यनजर गर्दै शुद्ध खानेपानीको व्यवस्था गरिएको बताए। “केन्द्रमा दैनिक रूपमा आउने सर्वसाधारण र ड्युटीमा खटिएका सुरक्षाकर्मीहरूको स्वास्थ्य र सुविधा हाम्रो प्राथमिकता हो,” उनले भने, “यस सहयोगले सेवा केन्द्रलाई अझ व्यवस्थित, सफा र सेवामैत्री बनाउन मद्दत पुगेको छ।”
स्थानीय बासिन्दाहरूले पनि उक्त पहलको स्वागत गरेका छन्। उनीहरूले यस किसिमको सुविधा विस्तारले सरकारी तथा सामुदायिक सेवा केन्द्रप्रति विश्वास बढाउने विश्वास व्यक्त गरेका छन्। साथै, यसले स्वच्छता र स्वास्थ्यप्रति सचेतना अभिवृद्धि गर्न समेत टेवा पुग्ने अपेक्षा गरिएको छ।
शुद्ध खानेपानीको व्यवस्था भएपछि सेवा लिन आउने सर्वसाधारण तथा केन्द्रमा कार्यरत प्रहरी कर्मचारीहरूलाई प्रत्यक्ष लाभ पुग्ने विश्वास गरिएको छ। यसले सेवा केन्द्रको वातावरण थप सहज, सुरक्षित र व्यवस्थित बन्न सहयोग पुग्ने जनाइएको छ।
यस सहयोगप्रति सामुदायिक प्रहरी सेवा केन्द्र छपकैया–२ परिवारले सहयोगी संस्था तथा व्यक्तिप्रति आभार व्यक्त गरेको छ। साथै, आगामी दिनमा पनि यस्ता सामाजिक सहकार्यलाई निरन्तरता दिने प्रतिबद्धता व्यक्त गरिएको छ।
