पर्सा पोस्ट, फागुन २६ गते, वीरगञ्ज।
समाज सेवामा सक्रिय रहँदै राष्ट्रिय स्वतन्त्र पार्टी (रास्वपा) का युवा नेता एवं समाजसेवी बृजेश्वर चौधरीले एक अति विपन्न परिवारलाई खाद्यान्न सामग्री सहयोग गरेका छन्।
वीरगञ्ज क्षेत्रमा बसोबास गर्दै आएका एक गरिब परिवारकी छोरीको विवाह हुन लागेको जानकारी पाएपछि चौधरीले आफ्नै पहलमा आवश्यक खाद्यान्न सामग्री उपलब्ध गराएका हुन्। आर्थिक अभावका कारण विवाहको व्यवस्थापन गर्न कठिनाइ भोगिरहेको उक्त परिवारलाई सहयोग पुगोस् भन्ने उद्देश्यले चामल, दाल, तेल लगायतका दैनिक उपभोग्य
खाद्यान्न सामग्री प्रदान गरिएको उनले बताए।
सहयोग प्रदान गर्दै चौधरीले राजनीति मात्र नभई सामाजिक उत्तरदायित्व पनि उत्तिकै महत्वपूर्ण रहेको बताए। उनले भने, “राजनीति त आफ्नो ठाउँमा भइरहेको छ, तर त्यससँगै समाज सेवामा पनि हामी सबैले हातेमालो गर्नुपर्छ। सानो सहयोगले पनि कसैको जीवनमा ठूलो राहत दिन सक्छ।”
सहयोग प्राप्त गरेपछि परिवारका सदस्यहरूले चौधरीप्रति आभार व्यक्त गर्दै यस्तो कठिन अवस्थामा पाएको सहयोगले ठूलो राहत महसुस भएको बताएका छन्। चौधरीले पनि विवाह हुन लागेकी बहिनीको दाम्पत्य जीवन सुखमय, सफल र समृद्ध होस् भन्ने कामना गर्दै भगवानसँग प्रार्थना गरेका छन्।
स्थानीय बासिन्दाहरूले चौधरीको यस मानवीय पहलको प्रशंसा गर्दै यस्ता सामाजिक कार्यले समाजमा सकारात्मक सन्देश फैलाउने र अन्यलाई पनि सहयोगका लागि प्रेरित गर्ने बताएका छन्।
