वीरगञ्ज । बाराको जितपुरस्थित बजार क्षेत्रमा वाणिज्य आपूर्ति तथा उपभोक्ता संरक्षण कार्यालय, बीरगंजको टोलीले अनुगमन गरेको छ। अनुगमनको क्रममा पाँच जना व्यवसायीमाथि आवश्यक कागजात नदेखाएको र म्याद सकिएका वस्तुहरू बिक्री वितरण गरेको आधारमा कारबाही गरिएको छ।
अनुगमन टोलीले बजारमा बिक्री वितरण भइरहेका वस्तुहरूको मूल्यसूची, खरिद–बिक्री बिल, साइनबोर्ड तथा प्यान–भ्याट दर्ता सम्बन्धी कागजातहरू जाँच गरेको थियो। कार्यालयका अनुसार केही व्यवसायीहरूले अनिवार्य कागजात प्रस्तुत नगरेको र उपभोक्ता अधिकारविपरीत गतिविधि गरेको पाइएको थियो।
वाणिज्य आपूर्ति तथा उपभोक्ता संरक्षण कार्यालय, बीरगंजले जनाएको अनुसार बजार अनुगमन दैनिक कार्य अन्तर्गत पर्ने भएकाले यसलाई छड्के रूपमा निरन्तर गरिनेछ।
अनुगमन टोलीमा जीतपुरसिमरा उपमहानगरपालिका कार्यालय, इलाका प्रशासन कार्यालय सिमरा, जीतपुरसिमरा नगर उद्योग वाणिज्य संघका प्रतिनिधि लगायतको सहभागिता रहेको थियो।
