अजित कुमार भुजेल , बिरगंज । उपकार सेवा नेपाल द्वारा बिरगंजका दुई जना अपांगता भएको व्यक्तिलाई ह्वील चेयर सहयाेग गरेको छ। उक्त संस्थाले बिरगंज महानगरपालिका वडा नम्बर १ छपकैयाका रन्जन दास र श्यामनाथ तुरहालाई १/१ थान ह्वील चेयर प्रदान गरेको हाे।
सोको जानकारी सामाजिक अभियन्ता प्रकाश थारूले गराएका हुन , उनका अनुसार केही दिनअघि आयोजित निःशुल्क आँखा शिविरका क्रममा ती व्यक्तिरूसँग भेटघाट भएको थियो। उक्त शिविरका क्रममा उनीहरूको असहज परिस्थितिबारे जानकारी पाएपछि अपांगता भएका तथा असहाय व्यक्तिहरूलाई सहयोग गर्दै आइरहेको उपकार सेवा नेपालकी अध्यक्ष विद्यादेवी सरावगी सहितकाे टाेलीले मंगलबार छपकैयामै पुगेर दुवै जनालाई ह्वील चेयर प्रदान गरेकी हुन्।
संस्थाकाे सहयोगले रन्जन दास र श्यामनाथ तुरहाको दैनिक जीवनयापनमा सहजता ल्याउने विश्वास गरिएको थारुले बताए।कार्यक्रममा जनमत पार्टीका पर्सा जिल्ला अध्यक्ष ओम प्रकाश सर्राफकाे पनि उपस्थिति रहेको थियो।
