पर्सा पोस्ट , जेष्ठ १५ गते , वीरगञ्ज ।
जगरनाथपुर गाउँपालिका वडा नं. ३, बिजबनियामा युवाहरूलाई खेलकुदप्रति प्रोत्साहित गर्ने उद्देश्यले समाजसेवी बृजेश प्रसाद चौधरीले क्रिकेट खेल सामग्री सहयोग गरेका छन्।
स्थानीय युवाहरूको खेलकुद गतिविधिलाई प्रवर्द्धन गर्ने उद्देश्यसहित चौधरीले एक थान क्रिकेट ब्याट तथा ६ थान स्टम्प हस्तान्तरण गरेका हुन्। उक्त सामग्री हस्तान्तरण कार्यक्रम स्थानीयस्तरमै सम्पन्न गरिएको थियो।
कार्यक्रममा समाजसेवी चौधरीसँगै सरफुदिन आलम, घनश्याम यादव, शुभनारायण यादव लगायत स्थानीय व्यक्तिहरूको उल्लेखनीय उपस्थिति रहेको थियो। सहभागीहरूले युवाहरूलाई खेलकुदमार्फत अनुशासित, स्वस्थ र सकारात्मक बनाउने अभियानमा यस्ता सहयोगले महत्वपूर्ण भूमिका खेल्ने बताएका थिए।
यस अवसरमा समाजसेवी चौधरीले युवाहरूलाई खेलकुदतर्फ आकर्षित गर्न र उनीहरूको प्रतिभा विकासमा सहयोग पुर्याउने उद्देश्यले निरन्तर रूपमा यस्ता सहयोग गर्दै आएको बताए। उनले आगामी दिनमा पनि खेलकुद सामग्रीसँगै गरिब तथा असहाय परिवारका लागि खाद्यान्न, कपडा तथा आर्थिक सहयोग जारी राख्ने प्रतिबद्धता व्यक्त गरे।
स्थानीयवासीहरूले चौधरीको यस पहललाई स्वागत गर्दै यसले गाउँका युवाहरूमा खेलकुदप्रतिको रुचि बढ्नुका साथै सामाजिक एकता र सकारात्मक सोचको विकासमा समेत टेवा पुग्ने विश्वास व्यक्त गरेका छन्।
स्थानीय युवाहरूले समेत गाउँस्तरमा खेलकुद गतिविधि सञ्चालनका लागि आवश्यक पूर्वाधार र सहयोगको आवश्यकता रहेको बताएका छन्। उनीहरूले यस्ता सामाजिक व्यक्तित्वको सहयोगले ग्रामीण क्षेत्रमा लुकेर रहेका प्रतिभावान खेलाडीहरूलाई अघि बढ्न प्रेरणा मिल्ने बताएका छन्।
