पर्सा पोस्ट , जेष्ठ १९ गते, वीरगञ्ज / रक्सौल, पूर्वी चम्पारण ।
समाजसेवी बिमल सर्राफले संगीत मानव जीवनको अभिन्न हिस्सा भएको उल्लेख गर्दै यसले मानसिक शान्ति, स्वास्थ्य संरक्षण तथा व्यक्तित्व विकासमा महत्वपूर्ण भूमिका खेल्ने बताएका छन्। लायन्स क्लब अफ रक्सौलका मिडिया इन्चार्ज तथा भारत विकास परिषद्, रक्सौलका सेवा संयोजक समेत रहेका सर्राफले पत्रकारहरूसँग कुराकानी गर्दै संगीत जीवनलाई सकारात्मक दिशामा अघि बढाउने माध्यम भएको बताए।
उनले मानव जीवनलाई संगीतमय धुनसँग तुलना गर्दै संगीतबाट निस्कने विभिन्न स्वरहरूले मानव हृदयमा आनन्द, उत्साह र मिठास पैदा गर्ने धारणा व्यक्त गरे। उनका अनुसार मधुर संगीतले मानसिक तनाव कम गर्नुका साथै स्वास्थ्यलाई सन्तुलित राख्न मद्दत पुर्याउँछ। “संगीतले रोगबाट बचाउने, मनलाई शान्त बनाउने र आयु वृद्धि गर्न सहयोग गर्ने क्षमता राख्छ,” उनले भने।
सर्राफले वेद तथा आयुर्वेदमा वर्णित सात चक्र र संगीतका सात स्वरबीच गहिरो सम्बन्ध रहेको उल्लेख गर्दै संगीतले शरीरका विभिन्न अंग तथा चेतनामा सकारात्मक प्रभाव पार्ने बताए। उनले दिनको बिहान र साँझको समय शरीरका लागि संवेदनशील हुने भएकाले त्यस समयमा मधुर संगीत सुन्नु लाभदायक हुने धारणा राखे।
उनका अनुसार मानिसको सोच, भावना र कार्यक्षेत्र जति फराकिलो हुन्छ, उसको क्षमता र सम्भावना पनि त्यति नै विस्तार हुँदै जान्छ। “मानिसले आफ्नो कल्पनाशक्ति, इच्छाशक्ति र भावनात्मक शक्तिलाई सही दिशामा प्रयोग गर्न सके जीवनमा कुनै पनि लक्ष्य असम्भव हुँदैन,” उनले बताए।
रचनात्मक सोच र सकारात्मक दृष्टिकोणले व्यक्तिलाई सफलताको मार्गतर्फ अघि बढाउने उल्लेख गर्दै उनले चरित्र निर्माणलाई जीवन व्यवस्थापनको आधारभूत पक्षका रूपमा व्याख्या गरे। असल चरित्र र अनुशासनले व्यक्तिलाई समाजमा उदाहरणीय नागरिक तथा प्रेरणादायी नेतृत्वकर्ता बन्न सहयोग गर्ने उनको भनाइ थियो।
कार्यक्रममा उपस्थित सञ्चारकर्मी तथा सामाजिक अगुवाहरूले पनि संगीत, नैतिकता र सकारात्मक सोचले समाज निर्माणमा महत्वपूर्ण भूमिका खेल्ने धारणा व्यक्त गरेका थिए।
