पर्सा पोस्ट , जेष्ठ २० गते, वीरगञ्ज ।
सामाजिक उत्तरदायित्व तथा सेवामूलक गतिविधिमा सक्रिय संस्था सर्कल अफ केयर (Circle of Care) ले जिल्ला ट्राफिक प्रहरी कार्यालय, पर्सालाई एक थान पानी डिस्पेन्सर सहयोग गरेको छ।
कार्यालय परिसरमा आयोजित एक विशेष कार्यक्रममा संस्थाका पदाधिकारीहरूले ट्राफिक प्रहरी कार्यालय पर्साका प्रमुख प्रहरी निरीक्षक युवराज कटवाललाई उक्त पानी डिस्पेन्सर औपचारिक रूपमा हस्तान्तरण गरेका हुन्। कार्यक्रममै दुवै पक्षबीच समुदायको हित, सार्वजनिक सेवाको गुणस्तर अभिवृद्धि तथा सामाजिक सहकार्यलाई थप प्रभावकारी बनाउने विषयमा समेत छलफल भएको थियो।
सर्कल अफ केयरका प्रतिनिधिहरूका अनुसार सडकमा दिनरात खटिने ट्राफिक प्रहरी कर्मचारीहरू तथा विभिन्न कामका लागि कार्यालयमा आउने सेवाग्राही नागरिकलाई स्वच्छ, सुरक्षित तथा सहज रूपमा खानेपानी उपलब्ध गराउने उद्देश्यले उक्त सहयोग गरिएको हो। संस्थाले समाजसेवा र मानवीय सहयोगमार्फत समुदायमा सकारात्मक प्रभाव पार्ने लक्ष्यसहित विभिन्न सामाजिक क्षेत्रमा निरन्तर योगदान गर्दै आएको जनाएको छ।
कार्यक्रमलाई सम्बोधन गर्दै संस्थाका प्रतिनिधिहरूले समाजको विकास तथा जनसेवाका क्षेत्रमा कार्यरत निकायहरूसँग सहकार्य गर्दै अघि बढ्नु संस्थाको प्रमुख प्राथमिकता रहेको बताए। उनीहरूले समुदाय र सेवामुखी संस्थाबीचको समन्वय तथा सहकार्यले समाजमा सकारात्मक परिवर्तन ल्याउन महत्वपूर्ण भूमिका खेल्ने धारणा व्यक्त गरे। साथै आगामी दिनमा शिक्षा, स्वास्थ्य, सरसफाइ तथा सामाजिक सेवासँग सम्बन्धित कार्यक्रमलाई थप प्रभावकारी रूपमा निरन्तरता दिने प्रतिबद्धता समेत जनाए।
कार्यक्रममा ट्राफिक प्रहरी कार्यालय पर्साका प्रमुख प्रहरी निरीक्षक युवराज कटवालले संस्थाको सहयोगप्रति आभार व्यक्त गर्दै यस्तो सहयोगले कार्यालयमा कार्यरत प्रहरी कर्मचारी तथा सेवाग्राहीहरूलाई प्रत्यक्ष लाभ पुग्ने बताए। उनले सामाजिक संस्थाहरूको साथ र सहकार्यले सार्वजनिक सेवाको प्रभावकारिता अभिवृद्धि गर्न महत्वपूर्ण योगदान पुग्ने विश्वास व्यक्त गरे।
उक्त कार्यक्रममा नरेश भंसाली, दिलिप कार्की लगायत विभिन्न क्षेत्रका व्यक्तित्वहरूको उपस्थिति रहेको थियो।
सहभागीहरूले सर्कल अफ केयरले समाजसेवा तथा मानवीय क्षेत्रमा गर्दै आएको योगदानको प्रशंसा गर्दै यस्ता सहयोगमूलक गतिविधिले समुदाय र सरकारी निकायबीचको सम्बन्ध अझ सुदृढ हुने धारणा व्यक्त गरेका थिए।
सर्कल अफ केयरले यसअघि पनि विभिन्न सामाजिक तथा मानवीय सेवामूलक कार्यक्रम सञ्चालन गर्दै आएको छ। संस्थाले आगामी दिनमा समेत समुदायको आवश्यकता अनुसार सहयोग तथा जनहितका कार्यक्रमलाई निरन्तरता दिने जनाएको छ।
