पर्सा पोस्ट, जेठ १७ गते, रक्सौल ।
भारत विकास परिषद् रक्सौल शाखाको आयोजनामा लोकमाता पुण्यश्लोका अहिल्याबाई होल्करको ३०१औँ जन्मजयन्ती आइतबार श्रद्धा, सम्मान र मर्यादापूर्वक मनाइएको छ। लक्ष्मीपुरस्थित महाराजा बैंक्वेट हलमा आयोजित कार्यक्रममा परिषद्का पदाधिकारी तथा सदस्यहरूले लोकमाताको योगदान स्मरण गर्दै श्रद्धाञ्जली अर्पण गरेका थिए।
शाखा अध्यक्ष रजनीश प्रियदर्शीको अध्यक्षतामा सम्पन्न कार्यक्रममा महिला सहभागिता संयोजक श्रीमती मेनका गुप्ताको नेतृत्वमा दीप प्रज्वलन तथा वन्दे मातरम् गायनबाट कार्यक्रमको शुभारम्भ गरिएको थियो। त्यसपछि भारत माता र लोकमाता अहिल्याबाई होल्करका तस्बिरमा पुष्प अर्पण गरी सम्मान प्रकट गरिएको थियो।
कार्यक्रमलाई सम्बोधन गर्दै अध्यक्ष प्रियदर्शीले लोकमाता अहिल्याबाई होल्करको व्यक्तित्व र योगदानले उनलाई विश्वकै महान् महिलामध्ये एकको रूपमा स्थापित गरेको बताए। उनले मालवाकी रानीका रूपमा सुशासन, जनकल्याण, धार्मिक संरक्षण तथा सामाजिक सद्भाव प्रवर्द्धनमा उल्लेखनीय योगदान दिएको उल्लेख गर्दै उनका आदर्शहरू आज पनि उत्तिकै सान्दर्भिक रहेको धारणा राखे।
महिला सहभागिता प्रमुख श्रीमती मेनका गुप्ताले अहिल्याबाई होल्कर भारतीय महिला शक्ति, मातृत्व, करुणा र नेतृत्वको अनुपम प्रतीक भएको बताइन्। उनले प्रतिकूल परिस्थितिमा समेत अदम्य साहस, धैर्यता र दूरदर्शिताका साथ आदर्श शासन सञ्चालन गर्दै जनकल्याणको स्वर्णिम इतिहास रचेको चर्चा गरिन्। महिलाहरूले उनको जीवन, सेवा भावना र समर्पणबाट प्रेरणा लिएर समाज तथा राष्ट्र निर्माणमा सक्रिय भूमिका खेल्नुपर्नेमा उनले जोड दिइन्।
शाखा कोषाध्यक्ष तथा कार्यक्रम निर्देशक सुनील कुमारले लोकमाता अहिल्याबाईलाई भारतीय संस्कृति, महिला सशक्तीकरण, सेवा र जनकल्याणको सशक्त प्रतीकको रूपमा वर्णन गरे। उनले न्याय, करुणा र धार्मिकताको आदर्श प्रस्तुत गर्दै शक्तिको सर्वोच्च उद्देश्य जनसेवा र राष्ट्रिय हित हुनुपर्ने सन्देश दिएको बताए।
त्यसैगरी शाखा सचिव नरेश कुमार र विजय कुमारले अहिल्याबाई शिवभक्ति, परोपकार र जनसेवाको अद्वितीय उदाहरण भएको उल्लेख गर्दै उनले बद्रीनाथदेखि रामेश्वरम तथा काशी विश्वनाथदेखि सोमनाथसम्मका धार्मिक स्थलहरूको निर्माण तथा पुनर्निर्माण गरी सनातन संस्कृतिको संरक्षणमा महत्वपूर्ण योगदान दिएको बताए।
वक्ताहरूले लोकमाताले गरिब, असहाय, सन्त, पशुपक्षी तथा कर्मचारीहरूको हितमा अनेकौँ लोककल्याणकारी कार्यहरू गरेको स्मरण गर्दै उनको जीवन मानव सेवा, समर्पण र करुणाको अनुपम उदाहरण भएको बताए।
कार्यक्रममा मेनका गुप्ता, रजनीश प्रियदर्शी, नरेश कुमार, योगेन्द्र प्रसाद, सुनील कुमार, उमेश सिकरिया, अजय कुमार, विनोद कुमार, विजय कुमार साह, विनोद रौनियार, सुरेश धनोठिया, दिनेश प्रसाद, सन्तोष कुमार, अमरेन्द्र कुमार, मनदीप कुमार, शरद सराफ र प्रतीक कुमारलगायत शाखाका सदस्यहरूको उल्लेखनीय उपस्थिति रहेको थियो।
कार्यक्रमसम्बन्धी जानकारी शाखाका सम्पर्क संयोजक उमेश सिकरिया तथा सेवा संयोजक एवं मिडिया इन्चार्ज बिमल कुमार सराफले दिएका हुन्।
