पर्सा पोस्ट, जेठ १७ गते, वीरगञ्ज।
वीरगञ्ज महानगरपालिका–२३ प्रसौनी बिर्तामा आइतबारदेखि चौथो संस्करणको “प्रसौनी प्रिमियम लिग (पीपीएल) २०८३” क्रिकेट प्रतियोगिता भव्य रूपमा सुरु भएको छ। स्थानीय युवाहरूमा खेलकुदप्रतिको आकर्षण बढाउने, अनुशासन र नेतृत्व क्षमताको विकास गर्ने तथा समाजमा आपसी सद्भाव र भाइचाराको भावना मजबुत बनाउने उद्देश्यसहित प्रतियोगिता आयोजना गरिएको हो।
प्रतियोगिताको उद्घाटन वडा नम्बर २३ का वडा सदस्य लालबाबु यादवले गरेका थिए। उद्घाटन समारोहलाई सम्बोधन गर्दै उनले खेलकुद युवाहरूको शारीरिक तथा मानसिक विकासको महत्वपूर्ण माध्यम भएको उल्लेख गर्दै यस्ता प्रतियोगिताले समाजमा सकारात्मक ऊर्जा प्रवाह गर्ने बताए।
उनले खेलकुद क्षेत्रको विकास र प्रतिभावान खेलाडीहरूको प्रोत्साहनका लागि वडा कार्यालयले आगामी दिनमा समेत आवश्यक सहयोगलाई निरन्तरता दिने प्रतिबद्धता व्यक्त गरे।
वडा नम्बर २३ को आर्थिक सहयोगमा सञ्चालन भइरहेको प्रतियोगितामा प्रसौनी लायन्स, रोयल्स च्यालेन्जर्स बैरिया, राइजिङ स्टार र सफु किंग्स गरी चार टोलीको सहभागिता रहेको छ। सहभागी टोलीहरूबीच उपाधिका लागि कडा प्रतिस्पर्धा हुने अपेक्षा गरिएको आयोजकले जनाएको छ।
कार्यक्रम संयोजक सुजित साहको अध्यक्षतामा सम्पन्न उद्घाटन समारोहमा नेकपा एमालेका नेता भोला यादव, नेपाली कांग्रेसका नेता धुरुप यादव, वडा सदस्य कान्ति देवी, युवा समाजसेवी फैयाज अन्सारीलगायत स्थानीय अगुवा, खेलप्रेमी तथा युवाहरूको उल्लेख्य उपस्थिति रहेको थियो।
उद्घाटन समारोहमा वक्ताहरूले खेलकुदलाई युवालाई दुर्व्यसन, हिंसा तथा नकारात्मक गतिविधिबाट टाढा राख्ने प्रभावकारी माध्यमका रूपमा व्याख्या गर्दै स्वस्थ, सभ्य र अनुशासित समाज निर्माणमा यसको महत्वपूर्ण भूमिका रहेको धारणा राखेका थिए।
संयोजक साहका अनुसार फाइनल खेलबाहेक प्रतियोगिताका सबै खेल १६ ओभरमा सञ्चालन गरिनेछन् भने उपाधि भिडन्त २० ओभरको हुनेछ। प्रतियोगितालाई व्यवस्थित, प्रतिस्पर्धात्मक तथा दर्शकमैत्री बनाउन सम्पूर्ण तयारी पूरा गरिएको उनले जानकारी दिए। प्रतियोगिता एक सातासम्म सञ्चालन हुने र विजेता तथा उपविजेता टोलीलाई आकर्षक पुरस्कार प्रदान गरिने कार्यक्रम रहेको छ।
स्थानीय युवाहरूको उत्साहजनक सहभागिता र दर्शकहरूको उल्लेख्य उपस्थितिबीच सुरु भएको प्रतियोगिताले प्रसौनी क्षेत्रको क्रिकेट विकासमा नयाँ ऊर्जा थप्ने विश्वास व्यक्त गरिएको छ। उद्घाटन खेल अवलोकन गर्न स्थानीय बासिन्दा, खेलप्रेमी तथा युवा समर्थकहरूको बाक्लो उपस्थिति रहेको थियो।
कार्यक्रमको सहजीकरण राकेश साहले गरेका थिए। आयोजकका अनुसार प्रतियोगितामार्फत ग्रामीण क्षेत्रका प्रतिभावान खेलाडीलाई आफ्नो क्षमता प्रदर्शन गर्ने अवसर उपलब्ध हुने तथा भविष्यमा क्षेत्रीय तथा राष्ट्रिय स्तरका खेलाडी उत्पादन गर्न समेत सहयोग पुग्ने अपेक्षा गरिएको छ।
