अजित कुमार भुजेल
रक्सौल/वीरगञ्ज, जेष्ठ १६ गते।
मृत्यु जीवनको अन्त्य हुन सक्छ, तर मानवताको सेवा र परोपकारको भावना कहिल्यै समाप्त हुँदैन। वीरगञ्जका दुई परिवारले आफ्ना प्रियजनको मृत्युपछि आँखा दान गरेर यस्तो उदाहरण प्रस्तुत गरेका छन्, जसले दुई दृष्टिविहीन व्यक्तिको जीवनमा नयाँ उज्यालो भरेको छ।
वीरगञ्ज निवासी स्वर्गीय शंकरलाल सरावागीका छोरा आशिष सरावागी र प्रदीप सरावागी तथा स्वर्गीय लक्ष्मणबहादुर श्रेष्ठका छोरा सुदर्शन श्रेष्ठले आफ्ना परिवारका दिवंगत सदस्यहरूको आँखा दान गर्न सहमति जनाएका हुन्। उनीहरूको यस निर्णयले दुई गरिब तथा दृष्टिविहीन व्यक्तिलाई पुनः संसार हेर्ने अवसर प्रदान गरेको छ।
तेरापन्थ युवक परिषद्, वीरगञ्जको समन्वय र सहयोगमा केडिया आँखा अस्पतालको विशेषज्ञ चिकित्सक टोलीले सफलतापूर्वक आँखा सङ्कलन गरेको थियो। यस कार्यलाई नेपाल–भारत सीमावर्ती क्षेत्रमा अंगदान तथा आँखा दानप्रतिको बढ्दो सामाजिक चेतनाको सकारात्मक संकेतका रूपमा हेरिएको छ।
लायन्स इन्टरनेशनलका आजीवन सदस्य लायन राधेश्याम खेतानले दुवै परिवारको निर्णयलाई मानव सेवाको उत्कृष्ट उदाहरणको रूपमा व्याख्या गर्दै प्रशंसा गरे। उनले मृत्युपछि पनि अरूको जीवनमा उज्यालो भर्ने यस्तो कार्यले समाजमा सकारात्मक सन्देश फैलाउने बताए।
यसैबीच, लायन्स क्लब अफ रक्सौलका अध्यक्ष, मिडिया इन्चार्ज तथा समाजसेवी बिमल सर्राफले आँखा दानलाई जीवनपछिको सबैभन्दा ठूलो मानवीय योगदानको संज्ञा दिए। “सेवा नै सत्य हो। शरीर समाप्त भए पनि सेवा र मानवताको प्रकाश जीवित रहन्छ,” उनले भने, “आफ्नो आँखा बन्द भए पनि आँखा दानमार्फत कसैको संसार सधैं उज्यालो बनाउन सकिन्छ।”
भारत विकास परिषद् शाखा–रक्सौलका अध्यक्ष रजनीश प्रियदर्शीले मृत्यु अन्त्य नभई अर्को जीवनमा आशा र प्रकाशको नयाँ सुरुवात हुन सक्ने धारणा व्यक्त गरे। “आँखा दान जस्तो महान कार्यले मानिसलाई मृत्यु पछि पनि समाजमा जीवित राख्छ,” उनले भने, “यसले अन्धकारमा बाँचिरहेका व्यक्तिलाई नयाँ जीवन र नयाँ सपना दिन्छ।”
उक्त मानवीय कार्यप्रति नेपालका प्रथम अन्तर्राष्ट्रिय निर्देशक ई. लायन संजय खेतान, प्रस्तावित अन्तर्राष्ट्रिय निर्देशक लायन राजन लम्साल, पूर्व अन्तर्राष्ट्रिय निर्देशक लायन बालकृष्ण बुर्लाकोटी, बहु परिषद् अध्यक्ष लायन केशर भण्डारी, जिल्ला गभर्नर लायन विनय बस्नेत, जिल्ला गभर्नर लायन नवराज सापकोटा, लायन सुशीला शाह, लायन नरोत्तम पाण्डे, लायन पिया सिंह, लायन प्रसिद्धि आनन्द सिंह, रोटेरियन अफ नेपाल, भारत विकास परिषद् शाखा–रक्सौलका सम्पर्क संयोजक उमेश सिकरिया तथा लायन्स क्लब अफ रक्सौलसहित विभिन्न सामाजिक संस्थाका प्रतिनिधिहरूले श्रद्धाञ्जली व्यक्त गर्दै दुवै दिवंगत परोपकारीप्रति सम्मान प्रकट गरेका छन्।
मानवताका यस्ता प्रेरणादायी उदाहरणहरूले समाजमा अंगदान र आँखा दानप्रतिको चेतना अभिवृद्धि गर्न महत्त्वपूर्ण भूमिका खेल्ने विश्वास व्यक्त गरिएको छ। सामाजिक अभियन्ताहरूले मृत्युपछि आँखा दान गर्ने संकल्प लिन सबैलाई आग्रह गर्दै यस अभियानलाई व्यापक बनाउनुपर्ने आवश्यकता औँल्याएका छन्।
“मृत्युले जीवन समाप्त गर्न सक्छ, तर आँखादानले कसैको जीवनभर उज्यालो दिन सक्छ।” यही सन्देशका साथ वीरगञ्जका यी दुई परिवारले मानवताको अनुपम उदाहरण स्थापित गरेका छन्।
