पर्सा पोस्ट, रक्सौल, कार्तिक १३ गते। छठ पूजाको शुभ अवसरमा समाजसेविका पार्वती तिवारीले रक्सौलको आईसीपी रोडस्थित महेर ममता निवासमा ५० जना असहाय दिदीबहिनीहरूलाई दिउँसो र बेलुकाको भोजन खुवाएर मानवता र सेवाको उत्कृष्ट उदाहरण प्रस्तुत गरेकी छिन्।
भक्ति, श्रद्धा र समर्पणले भरिएको वातावरणमा सम्पन्न सो कार्यक्रममा सहभागी दिदीबहिनीहरूले छठी मैयाको आशीर्वाद लिएर सौहार्दपूर्ण रूपमा भोजन ग्रहण गरेका थिए।
सो अवसरमा समाजसेविका तिवारीले भनिन्, “छठी मैयाको कृपाले म आज ५० जना खाँचोमा परेका दिदीबहिनीहरूलाई भोजन खुवाउन सक्षम भएँ। मेरो हार्दिक इच्छा छ, भविष्यमा हजारौं दिदीबहिनीहरूको सेवा गर्ने अवसर मिलोस्।” उनले आफ्नो यो पवित्र प्रयास सफल बनाउन साथ दिने साथीहरू, शुभेच्छुक र सहयोगीहरूप्रति हार्दिक आभार व्यक्त गरिन्।
उनका अनुसार, यो कार्य सबैको सहयोग र स्नेहको परिणाम हो। छठ पूजाले सूर्य आराधना, मातृशक्तिको सम्मान, एकता र करुणाको प्रतीक भएको भन्दै उनले यस्ता अवसरमा गरिएको सेवा कार्यले समाजमा प्रेरणादायी सन्देश फैलाउने बताइन्।
कार्यक्रमको अन्त्यमा पार्वती तिवारीले भनिन्,“छठी मैयाले सबैमाथि आशीर्वाद बरसाओस् र मलाई सधैं सेवाको मार्गमा अघि बढ्ने शक्ति प्रदान गरून्।”
