अजित कुमार भुजेल , बिरगंज । मधेसी समाजका दिदिबहिनीहरुले भाईदुज पर्व आज धुमधामका साथ मनाएका छन् ।
मधेसी समुदायमा दिदी–बहिनीहरूले आफ्ना दाजुभाइको दीर्घायुको कामना गर्दै भाई दूज पर्व मनाइरहेका छन। भाई दूज पर्व दिदीबहिनीहरु र दाजुभाइहरबीचको प्रेम एवम् मायाको पर्व मानिन्छ। गोवर्धन पूजाको भोलिपल्ट यो पर्व मनाउने प्रचलन रहेको छ।
मधेसी समुदायका दिदीबहिनीहरूले बिहानै ४ बजे उठेर भगवान गोवर्धनको पूजा गरी दाजुभाइहरुको लामो आयु एवं सुखी जीवनको कामना समेत गर्ने गर्छन।
सो अवसरमा बहिनीहरूले भगवान गोवर्धन अगाडी श्राप दिएर आफ्ना दाजुभाइहरुलाई मार्ने गर्छन र फेरि गोवर्धन भगवान समकक्ष श्राप मुक्त गराउछन भने सम्पूर्ण दुःख र कष्टबाट मुक्त गराउन प्रार्थना समेत गर्छन। यसरी श्राप दिएर पुनः श्राप मुक्त गराउँदा भाइहरूको जीवनमा सकारात्मक उन्नति र सुस्वास्थ्य आउने विश्वास गरिन्छ।
आजको दिनमा मधेसी समुदायका भाईबहिनि एवं महिलाहरू समूहमा भेला भएर गोवर्धन पूजासँगै परम्परागत गीत पनि गाउने गर्छन । सोही दिन दिदि बहिनीहरूले आफ्नै जिब्रो काँडाले घोचेर आफ्नो दाजुभाइहरुलाई श्राप दिएर पुर्ण मुक्त गराउँछन। यो धार्मिक परम्परा प्राचीनकालदेखि चल्दै आएको हो। भाई दूजपर्वको दिन दिदीबहिनीहरूले दाजुभाइहरलाई केराउको दाना एवम् लडडु ‘बजडी’ को रूपमा खुवाएर उनीहरूको स्वस्थ रहोस भन्ने कामना समेत गर्छन।
