पर्सा पोस्ट , मंसिर २९ गते , रक्सौल ।
बढ्दो चिसोको प्रभाव बढ्दै जाँदा भारतीय जनता पार्टी (भाजपा) की नेतृ तथा समाजसेवी पार्वती तिवारीले रक्सौलमा मानवीय अभियान सञ्चालन गर्दै खाँचोमा परेका महिला, पुरुष तथा ज्येष्ठ नागरिकहरूलाई कम्बल वितरण गरेकी छन्। आइतबार राति १० बजेपछि सुरु गरिएको उक्त अभियान अन्तर्गत रक्सौलको मुख्य बस स्ट्यान्ड, रेलवे स्टेशन तथा विभिन्न सार्वजनिक स्थानमा आश्रयविहीन र कमजोर वर्गलाई न्यानो कम्बल प्रदान गरिएको हो।
भाजपा जिल्ला महिला मोर्चा, रक्सौलकी महासचिव तथा सामाजिक कार्यकर्ताको रूपमा सक्रिय पार्वती तिवारी स्वयं सडकमा पुगेर खाँचोमा परेकाहरूसँग प्रत्यक्ष संवाद गर्दै कम्बल वितरणमा संलग्न भइन्। कम्बल वितरणको क्रममा उनले भनिन्, “गरिब, असहाय र खाँचोमा परेकाको सेवा गर्नु नै साँचो सेवा हो। समाजका सबै वर्गप्रति संवेदनशील हुनु हाम्रो साझा जिम्मेवारी हो।”
उनले बढ्दो चिसोका कारण विशेषगरी वृद्धवृद्धा, निःसहाय तथा सडकमा जीवन बिताइरहेका व्यक्तिहरू बढी प्रभावित भएको उल्लेख गर्दै रातको समयमा उनीहरूलाई केही राहत दिने उद्देश्यले यो सानो प्रयास गरिएको बताइन्। कम्बल पाएका स्थानीयहरूले उनको पहलप्रति आभार व्यक्त गर्दै प्रशंसा र आशीर्वाद दिएका छन्।
स्थानीयवासीहरूका अनुसार यस प्रकारका राहत कार्यक्रमले चिसोबाट तत्काल राहत प्रदान गर्नुका साथै समाजमा भाइचारा, सहानुभूति र मानवताको सन्देश प्रवाह गर्न महत्वपूर्ण भूमिका खेल्नेछ र अन्यलाई पनि सामाजिक सेवामा प्रेरित गर्नेछ।
कार्यक्रममा पार्वती तिवारीकी आमा हीरा देवीले पनि सक्रिय सहभागिता जनाउँदै स्वयं कम्बल वितरणमा सहयोग गरेकी थिइन्। त्यस्तै, भाजपा जिल्ला खेलकुद सेलका संयोजक तथा पार्वती तिवारीका भाइ आर्यन तिवारी पनि कार्यक्रममा उपस्थित रही सामाजिक सेवामा योगदान दिएका थिए।
यस मानवीय पहलले सामाजिक सञ्जालमा समेत सकारात्मक प्रतिक्रिया पाइरहेको छ। सामाजिक सञ्जाल प्रयोगकर्ताहरूले पार्वती तिवारीको कार्यलाई मानवीय भावना र सामाजिक सेवाको प्रेरणादायी उदाहरण भन्दै प्रशंसा गरिरहेका छन्।
