पर्सा पोस्ट, कार्तिक १२ गते, वीरगञ्ज। चार दिनसम्म श्रद्धा, आस्था र सूर्य उपासनासँग सम्बन्धित पर्व छठी मैयाँ आज उदाउँदो सूर्य (उषाकालीन अर्घ्य)लाई अर्घ्य अर्पण गर्दै विधिवत् रूपमा सम्पन्न भएको छ।
व्रतालुहरूले बिहानै नदी, पोखरी र तलाउमा स्नान गरी सूर्य भगवानलाई दूध, जल, गँगाजल, ठेकुआ, फलफूल लगायतका सामग्रीसहित पूजा अर्चना गरेका थिए। वीरगञ्जका घडिअर्वा पोखरी, रानीघाट, माईधिया, श्रीपुर र आदर्शनगरलगायतका प्रमुख छठघाटहरूमा बिहानैदेखि भक्तजनको घुँइचो लागेको थियो।
सूर्य भगवान र छठी मैयाँप्रति कृतज्ञता व्यक्त गर्दै व्रतालुहरूले परिवारको दीर्घायु, सुख–शान्ति र समृद्धिको कामना गरेका छन्। स्थानीय प्रशासन, प्रहरी र स्वयंसेवक समूहहरू सक्रिय रहँदा छठपर्व शान्तिपूर्ण र भव्य रूपमा सम्पन्न भएको छ।
