अजित कुमार भुजेल , बिरगंज ।लागूऔषध गाजा सहित बिरगंजबाट एक जना युवकलाई पर्सा प्रहरीले नियन्त्रणमा लिएको छ ।
बिरगंज महानगरपालिका वडा न. १६ नगवा स्थित फूलबारी टोल निवासी बर्ष २३ को शेख सदामलाई घरमा छापा मारी गरी लागूऔषध गाँजासहित नियन्त्रणमा लिएको हो ।
सदामले आफ्नै घरमा अवैध तरिकाले लागूऔषध लुकाएर राखेको र विक्री वितरण समेत गर्ने गरेको विशेष सूचनाको आधारमा जिल्ला प्रहरी कार्यालय पर्सा र लागूऔषध नियन्त्रण ब्युरो पर्साबाट खटिएको संयुक्त टोलिले उनलाई मङ्गलवार दिउँसो नियन्त्रणमा लिएको पर्सा प्रहरीका प्रवक्ता एवम् प्रहरी नायव उपरीक्षक कुमार विक्रम थापाले जानकारी दिनुभयो ।
प्रहरीले सदामको घरमा उनी सुत्ने कोठाको खाट मुनी कालो रङ्गको प्लास्टिकको डब्बाभित्र लुकाई छिपाइ राखिएको ६ किलो ५०० ग्राम गाँजा र त्यसलाई तौल गर्ने दुई थान डिजिटल तराजु समेत बरामद गरेको डिएसपी थापाले बताए ।
लागूऔषध सहित सदामलाई नियन्त्रणमा राखेर थप अनुसन्धानको कार्य अगाडि बढाइएको समेत थापाले बताए ।
