पर्सा पोस्ट , असार २२ गते , कलैया, बारा ।
कलैयास्थित यातायात व्यवस्था कार्यालय, बारामा कार्यरत ट्रायल प्रमुख जीवनरमण पौडेलमाथि कार्यालय परिसरभित्रै मोबिल प्रहार भएको घटनाको करिब चार महिना बितिसक्दा पनि घटनामा संलग्न भनिएका व्यक्ति पक्राउ नपरेपछि कर्मचारीहरूमा त्रास र असुरक्षाको भावना बढ्दै गएको छ। कर्मचारीहरूले घटनाको निष्पक्ष अनुसन्धान गरी दोषीमाथि शीघ्र कानुनी कारबाही गर्न माग गरेका छन्।
गत फागुन महिनामा कार्यालय परिसरभित्र भएको उक्त घटनाले सरकारी कार्यालयभित्र कार्यरत कर्मचारीहरूको सुरक्षामाथि गम्भीर प्रश्न उठाएको थियो। कार्यालय परिसरमै ट्रायल प्रमुख पौडेलमाथि मोबिल प्रहार भएपछि कर्मचारीहरूले आफूहरू सुरक्षित वातावरणमा काम गर्न नसकेको बताएका छन्। घटनामा आनन्द गुप्ता नाम गरेका व्यक्तिको संलग्नता रहेको चर्चा सार्वजनिक रूपमा भए पनि घटनाको कारण, उद्देश्य तथा कानुनी जिम्मेवारीबारे सम्बन्धित निकायबाट हालसम्म आधिकारिक निष्कर्ष सार्वजनिक गरिएको छैन।
घटनापछि जिल्ला प्रहरी कार्यालय बाराले कार्यालय परिसरमा जडान गरिएको सिसिटिभी फुटेजका आधारमा अनुसन्धान सुरु गरिएको जनाएको थियो। प्रहरी स्रोतका अनुसार घटनामा संलग्न व्यक्तिको पहिचान तथा पक्राउका लागि विभिन्न कोणबाट अनुसन्धान अगाडि बढाइएको छ। तर, यति लामो समयसम्म पनि कुनै ठोस उपलब्धि सार्वजनिक नभएको भन्दै कर्मचारीहरूले प्रहरी प्रशासनको कार्यशैलीप्रति असन्तुष्टि जनाएका छन्।
नाम नखुलाउने सर्तमा कार्यालयका एक कर्मचारीले भने, “कार्यालयभित्रै कर्मचारीमाथि आक्रमण हुँदा पनि दोषी कानुनी दायरामा नआउनुले कर्मचारीहरूको मनोबल कमजोर भएको छ। यस्ता घटनामा शीघ्र कारबाही नभए भविष्यमा थप समस्या निम्तिन सक्छ।”
उनका अनुसार घटनापछि कार्यालयमा काम गर्ने वातावरणसमेत प्रभावित भएको छ भने कर्मचारीहरू मानसिक दबाबमा काम गर्न बाध्य भएका छन्। केही कर्मचारीहरूले कार्यालयभित्र सुरक्षा व्यवस्था थप मजबुत बनाउनुपर्ने आवश्यकता औँल्याएका छन्।
यसैबीच, कार्यालय प्रमुख चिन्तन आचार्यसँग सम्बन्धित एउटा भिडियो सामाजिक सञ्जालमा सार्वजनिक भएपछि यातायात व्यवस्था कार्यालय, बाराले असार २२ गते औपचारिक विज्ञप्ति जारी गर्दै भाइरल बनाइएको भिडियो घटनाको सम्पूर्ण दृश्य नभई सम्पादित अंश मात्र भएको जनाएको छ। कार्यालयले सार्वजनिक सामग्रीले घटनाको वास्तविकता पूर्ण रूपमा प्रस्तुत नगरेको दाबी गरेको छ।
कार्यालय प्रमुख आचार्यले आफ्नो चरित्रमाथि आँच पुर्याउने तथा कार्यालयलाई बदनाम गर्ने उद्देश्यले घटनाको पूरा भिडियो सार्वजनिक नगरी केही अंश मात्र सामाजिक सञ्जालमा राखिएको आरोप लगाएका छन्। उनका अनुसार सम्पूर्ण भिडियो हेर्दा घटनाको वास्तविक अवस्था स्पष्ट हुने भए पनि आंशिक दृश्य मात्र सार्वजनिक गरिएकाले आमजनतामा भ्रम फैलिएको छ।
विज्ञप्तिअनुसार आफूलाई पत्रकार भनेर परिचय दिएका एक व्यक्तिले कार्यालयमा प्रवेश गरी कर्मचारीहरूमाथि अनावश्यक दबाब सिर्जना गर्ने, अपशब्द प्रयोग गर्ने तथा नियमित प्रशासनिक कार्यमा अवरोध पुर्याउने गतिविधि गरेपछि सामान्य विवाद उत्पन्न भएको उल्लेख गरिएको छ। कार्यालयले घटनापछि दुवै पक्षबीच छलफल भएको र आपसी सहमतिमार्फत मिलापत्रसमेत भइसकेको जनाएको छ।
कार्यालयले आफ्नो मुख्य उद्देश्य सेवाग्राहीलाई सहज, पारदर्शी तथा गुणस्तरीय सेवा प्रदान गर्नु रहेको स्पष्ट पार्दै कुनै पनि अनुसन्धान वा छानबिनमा पूर्ण सहयोग गर्ने प्रतिबद्धता व्यक्त गरेको छ। साथै, अपूर्ण भिडियो वा एकपक्षीय सूचनाका आधारमा भ्रम सिर्जना नगर्न सञ्चारमाध्यम, सामाजिक सञ्जाल प्रयोगकर्ता तथा सरोकारवालासँग आग्रह गरिएको छ।
उक्त घटनाले एकातिर सरकारी कर्मचारीहरूको सुरक्षा व्यवस्था र कानुन कार्यान्वयन गर्ने निकायको प्रभावकारितामाथि प्रश्न उठाएको छ भने अर्कोतर्फ सामाजिक सञ्जालमा सम्पादित सामग्री सार्वजनिक गर्दा घटनाको वास्तविकता ओझेलमा पर्न सक्ने बहसलाई पनि थप तीव्र बनाएको छ।
कर्मचारीहरूले मोबिल प्रहार घटनाको निष्पक्ष अनुसन्धान गरी दोषीलाई कानुनबमोजिम कारबाही गर्न माग गरेका छन्। उता, कार्यालयले पनि सत्यतथ्यका आधारमा मात्र सार्वजनिक धारणा बनाउन सबैसँग आग्रह गरेको छ।
यातायात व्यवस्था कार्यालय, बाराले आफू कानुनको परिधिभित्र रही सेवाग्राहीलाई सरल, सुरक्षित तथा गुणस्तरीय सेवा प्रवाह गर्न प्रतिबद्ध रहेको दोहोर्याउँदै घटनाको सत्यतथ्य सम्बन्धित निकायको अनुसन्धानपछि मात्र स्पष्ट हुने जनाएको छ।
