पर्सा पोस्ट , असार १३ गते , रक्सौल ।
भारत विकास परिषद्, रक्सौल शाखाले परिषद्का संस्थापक तथा प्रथम राष्ट्रिय महासचिव डा. सुरज प्रकाशको १०६औँ जन्मजयन्ती शनिबार श्रद्धा, सम्मान र उत्साहका साथ भव्य रूपमा मनाएको छ। शाखा अध्यक्ष रजनीश प्रियदर्शीको अध्यक्षतामा कोइरिया टोलास्थित सूर्य नारायण परिसरमा आयोजित कार्यक्रममा दीप प्रज्वलन, वन्दे मातरमको सामूहिक पाठ, डा. सुरज प्रकाशको तस्बिरमा पुष्पाञ्जली अर्पण तथा केक काटेर कार्यक्रमको औपचारिक शुभारम्भ गरिएको थियो।
कार्यक्रमलाई सम्बोधन गर्दै अध्यक्ष रजनीश प्रियदर्शीले डा. सुरज प्रकाशको सम्पूर्ण जीवन राष्ट्रसेवा, मानवता र समर्पणको अनुपम उदाहरण भएको बताउनुभयो। उहाँले समाजमा सेवा, नैतिक मूल्य र सामाजिक उत्तरदायित्वको भावना जागृत गराउन डा. सुरज प्रकाशले खेलेको भूमिका आज पनि प्रेरणादायी रहेको उल्लेख गर्नुभयो। उहाँका अनुसार परिषद्का सदस्यहरूले उहाँका आदर्श र सिद्धान्तलाई आत्मसात् गर्दै समाजसेवामा निरन्तर सक्रिय भूमिका निर्वाह गरिरहेका छन्।
कोषाध्यक्ष सुनिल कुमार तथा सेवा संयोजक एवं मिडिया इन्चार्ज विमल कुमार सर्राफले भारत विकास परिषद् केवल सामाजिक संस्था मात्र नभई सेवा, संस्कार, सहयोग, सम्बन्ध र समर्पणमा आधारित राष्ट्रिय अभियानका रूपमा स्थापित भएको धारणा व्यक्त गर्नुभयो। उहाँहरूले सन् १९६३ मा २० जना प्रतिष्ठित नागरिकको पहलमा स्थापना भएको परिषद् आज देशव्यापी सशक्त सामाजिक संस्थाका रूपमा विकसित भई राष्ट्र निर्माण तथा जनसेवाका विविध क्षेत्रमा उल्लेखनीय योगदान पुर्याइरहेको जानकारी दिनुभयो।
कार्यक्रममा सम्पर्क संयोजक उमेश सिकारिया, संस्कृति संयोजक नितेश कुमार सिंह, वातावरण संयोजक विजय कुमार साह तथा अजय कुमारले डा. सुरज प्रकाशको प्रेरणादायी जीवनयात्रा, भारत विभाजनका बेला उहाँले पुर्याएको मानवीय योगदान तथा भारत विकास परिषद्को स्थापना र विस्तारबारे प्रकाश पार्नुभएको थियो। वक्ताहरूले उहाँका आदर्शलाई व्यवहारमा उतार्दै समाजमा सेवा र सद्भावको भावना विस्तार गर्न सबैलाई आग्रह गरेका थिए।
वक्ताहरूले सन् १९६२ को भारत–चीन युद्धपछि स्थापित नागरिक परिषद् नै सन् १९६३ मा भारत विकास परिषद्का रूपमा विकसित भएको उल्लेख गर्दै परिषद्ले शिक्षा, स्वास्थ्य, संस्कार प्रवर्द्धन, वातावरण संरक्षण, सामाजिक सेवा तथा जनकल्याणका क्षेत्रमा निरन्तर रचनात्मक कार्य गर्दै आइरहेको बताएका थिए।
कार्यक्रममा शाखाका पदाधिकारी, सदस्य तथा समाजका विभिन्न क्षेत्रका व्यक्तिहरूको उल्लेखनीय उपस्थिति रहेको थियो। कार्यक्रममा सुनिल कुमार, उमेश सिकारिया, नितेश कुमार सिंह, विमल कुमार सर्राफ, सुरेश धानोठिया, अजय कुमार, प्रशान्त कुमार, अरुण कुमार, विनोद कुमार, धरमनाथ प्रसाद, महिला सहभागिता प्रमुख मेनका गुप्ता, विनोद रौनियार, सन्तोष कुमार, दिनेश प्रसाद, किरण गुप्ता, सीमा गुप्ता लगायतको सहभागिता रहेको थियो।
कार्यक्रमको समापन राष्ट्रिय गानसँग गरिएको थियो। कार्यक्रमबारे जानकारी सम्पर्क संयोजक उमेश सिकारिया तथा सेवा संयोजक एवं मिडिया इन्चार्ज विमल कुमार सर्राफले दिनुभएको थियो। परिषद्का पदाधिकारीहरूले आगामी दिनमा पनि सामाजिक सेवा, संस्कारमूलक अभियान तथा राष्ट्रहितका कार्यक्रमलाई निरन्तरता दिने प्रतिबद्धता व्यक्त गरेका छन्।
