पर्सा पोस्ट , असार ०४ गते , रक्सौल, पूर्वी चम्पारण ।
मानव जीवनमा सहानुभूति, प्रेम, दया र करुणाको महत्व अत्यन्त गहिरो रहेको भन्दै सामाजिक कार्यकर्ता बिमल सर्राफले यस्ता मानवीय गुणहरूको अभावले समाजमा अशान्ति र असन्तुलन बढ्दै गएको बताएका छन्।
लायन्स क्लब अफ रक्सौलका अध्यक्ष तथा मिडिया इन्चार्ज, साथै भारत विकास परिषद् रक्सौलका सेवा संयोजक एवं मिडिया इन्चार्ज समेत रहेका सर्राफले प्रेससँग कुरा गर्दै मानिस भगवानको सबैभन्दा उत्कृष्ट सृष्टि भए पनि मानवीय संवेदनाको कमीले आजको समाज चुनौतीपूर्ण बन्दै गएको धारणा व्यक्त गरे।
उनले सहानुभूति मानव हृदयको कोमल भावना भएको उल्लेख गर्दै यो दया, प्रेम र करुणाको मिश्रणबाट निर्माण हुने बताए। “सहानुभूति आत्माको निस्वार्थ भाषा हो, जसलाई शब्दभन्दा बढी हृदयले बुझ्छ,” उनले भने।
सर्राफका अनुसार आजको व्यस्त र भौतिकवादी जीवनशैलीका कारण मानिसहरू प्रेम, दया र सहयोगजस्ता मानवीय गुणबाट टाढिँदै गएका छन्। यस्ता सकारात्मक भावनालाई बेवास्ता गर्दा मानसिक तनाव, पारिवारिक विवाद तथा सामाजिक असन्तुलन बढ्ने खतरा रहने उनले बताए।
उनले प्रेमविहीन जीवन नीरस र उजाड बन्ने उल्लेख गर्दै करुणा र सहयोगबिनाको समाजमा आपसी विश्वास कमजोर हुने धारणा राखे। समाजलाई सभ्य, शान्त र समुन्नत बनाउन प्रत्येक व्यक्तिले मानवीय मूल्य र नैतिकतालाई आत्मसात गर्नुपर्नेमा उनले जोड दिए।
सामाजिक सद्भाव, आपसी सम्मान र सहयोगको भावना विकास गर्न युवापुस्ताले विशेष भूमिका खेल्नुपर्ने सर्राफको भनाइ थियो। उनले मानवीय गुणहरूलाई व्यवहारमा उतार्न सके परिवारदेखि समाजसम्म सकारात्मक परिवर्तन सम्भव हुने विश्वास व्यक्त गरे।
