पर्सा पोस्ट, जेष्ठ ०५ गते, रक्सौल, पूर्वी चम्पारण ।
मुस्कानले मानिसको जीवनमा सकारात्मक ऊर्जा, आत्मविश्वास र मानसिक शान्ति प्रदान गर्ने भएकाले यसलाई जीवनको सबैभन्दा सरल औषधिका रूपमा लिनुपर्ने सामाजिक कार्यकर्ता बिमल सर्राफले बताएका छन्।
लायन्स क्लब अफ रक्सौलका अध्यक्ष तथा मिडिया प्रभारी, भारत विकास परिषद् रक्सौलका सेवा संयोजक एवं मिडिया प्रभारीसमेत रहेका सर्राफले प्रेससँग कुरा गर्दै मुस्कानले अस्थायी रूपमा तनावबाट मुक्ति दिलाउनुका साथै मानिसलाई नयाँ ऊर्जा प्रदान गर्ने बताए। उनका अनुसार मुस्कुराएको अनुहारले केवल अरूलाई आकर्षित मात्र गर्दैन, यसले व्यक्तिको मन र शरीरलाई सकारात्मक भावनाले भरिदिन्छ।
उनले मुस्कानलाई मित्रता, सद्भाव र आत्मीयताको प्रतीकको रूपमा व्याख्या गर्दै अपरिचित ठाउँमा समेत हल्का मुस्कानले सम्बन्ध निर्माण गर्न सहयोग गर्ने उल्लेख गरे। “मुस्कान व्यक्तित्वको गौरव हो। यो निःशुल्क, सहज र प्रभावकारी औषधि हो, जसले जीवनमा आशा र उत्साह थप्छ,” उनले भने।
सर्राफले मनोवैज्ञानिकहरूका भनाइ उद्धृत गर्दै वास्तविक र हृदयदेखि आएको मुस्कानले मस्तिष्कमा सकारात्मक संकेत पठाउने बताए। उनका अनुसार साँचो मुस्कानले व्यक्तिलाई सुरक्षित, आत्मविश्वासी र सन्तुलित अनुभूति गराउँछ। झूटो मुस्कान कृत्रिम हुने भएकाले त्यसले दीर्घकालीन प्रभाव पार्न नसक्ने उनको भनाइ थियो।
उनले डाक्टरको मुस्कुराएको अनुहारले बिरामीको आधा रोग निको पार्ने जनविश्वास उल्लेख गर्दै समाजमा सकारात्मक सोच फैलाउन सबैले मुस्कानको संस्कृतिलाई आत्मसात् गर्नुपर्ने धारणा राखे। “कसैलाई खुशी दिन ठूलो सम्पत्ति आवश्यक पर्दैन, एउटा साँचो मुस्कान नै पर्याप्त हुन्छ,” उनले बताए।
उनका अनुसार आजको व्यस्त र तनावपूर्ण जीवनशैलीमा मानिसहरू मानसिक दबाबमा बाँचिरहेका छन्। यस्तो अवस्थामा एकअर्काप्रति सद्भाव, आत्मीयता र मुस्कानको व्यवहारले समाजमा सकारात्मक वातावरण निर्माण गर्न महत्वपूर्ण भूमिका खेल्नेछ।
कार्यक्रममा उपस्थित विभिन्न सामाजिक अभियन्ता तथा स्थानीय बुद्धिजीवीहरूले पनि मुस्कानले मानव सम्बन्धलाई बलियो बनाउने र समाजमा प्रेम, सहिष्णुता तथा सहयोगको भावना विकास गर्ने धारणा व्यक्त गरेका थिए।
