अजित कुमार भुजेल , बिरगंज । जिल्ला प्रहरी कार्यालय पर्साले चोरीको मोटरसाइकल सहित एक जना व्यक्तिलाई पक्राउ गर्न सफल भएको छ। शनिवार राति करिब २ बजेको समयमा बिरगंज महानगरपालिका वडा न.३१ को कोनिया टोलबाट बिनय पटेलको घर अगाडिबाट हराएको प्रदेश २–०३–०५ प ७५४९ नम्बरको नावी कालो रंगको सुपर स्प्लेन मोटरसाइकल प्रहरीले बरामद गरेको हो।
प्रहरीले प्राप्त विशेष सूचनाका आधारमा खोजतलास गर्ने क्रममा जिल्ला प्रहरी कार्यालय पर्साबाट खटिएको टोलीले आईतवार बिहान ११ बजे उक्त मोटरसाइकल सहित बिरगंज महानगरपालिका वडा न.३१ का १९ वर्षीय विद्यानन्द महतो पक्राउ परेको जनाएको छ।
हाल पक्राउ परेका महतोलाई जिल्ला अदालत पर्साबाट ७ दिनको म्याद थप गरी आवश्यक अनुसन्धान अगाडि बढाइएको प्रहरीले जानकारी दिएको छ।
