अजित कुमार भुजेल , बिरगंज । बिरगंज महानगरपालिकाको १७ औं नगरसभा अधिवेशन सम्पन्न भएको छ।
सोमबार आयोजित उक्त कार्यक्रममा बिरगंज महानगर पालिकाका उपप्रमुख इम्तियाज आलमले आगामी आर्थिक वर्षका लागि ३ अर्ब २२ करोड ४८ लाख ४९ हजार रुपैयाँको अनुमानित आयव्यय सहितको बजेट प्रस्तुत गरेका हुन् ।बिरगंज महानगरपालिकाले आगामी आर्थिक वर्ष २०८२/०८३ का लागि ३ अर्ब २२ करोड ४८ लाख ४९ हजार रुपैयाँको अनुमानित बजेट ल्याएको छ ।
सोमबारको नगरसभामा उपप्रमुख इम्तियाज आलमले प्रस्तुत गरेको आगामी आर्थिक वर्षको बजेटमा चालू खर्चतर्फ २ अर्ब २६ करोड ५० लाख ४९ हजार अर्थात कूल बजेटको ७०.२४ प्रतिशत,पूँजीगत खर्चतर्फ ९२ करोड ३४ लाख अर्थात कूल बजेटको २८.६४ प्रतिशत र वित्तीय व्यवस्थापनतर्फ ३ करोड ६४ लाख अर्थात १.१२ प्रतिशत रहेको उल्लेख छ ।
बिरगंज महानगरले आगामी आर्थिक वर्षका लागि चालु आर्थिक वर्षको भन्दा झण्डै ३३ करोड बढी बजेट ल्याएको छ । चालु आर्थिक वर्षका लागि बिरगंज महानगरको बजेट २ अर्ब ८९ करोड ४८ लाख १७ हजार रुपैयाँको थियोे । नगरसभामा बजेट प्रस्तुत गर्दै उप प्रमुख आलमले आगामी आर्थिक वर्षको बजेटका प्राथमिकतामा शिक्षा,स्वास्थ्य,कृषि,पर्यटन , सरसफाइ ,
वातावरण संरक्षण,गुणस्तरीय भौतिक पूर्वाधार र डिजिटलमैत्री सेवा प्रवाह रहेको पनि बताए ।
आगामी आर्थिक वर्षको बजेटमा अनुमानित खर्च व्यहोर्ने श्रोतहरुमा आन्तरिक राजश्वबाट एक अर्ब १५ करोड,संघीय अन्तर सरकारी वित्तीय हस्तान्तरणबाट एक अर्ब ३७ करोड ३० लाख , संघीय राजश्व बाँडफाँटबाट २३ करोड ७८ लाख,प्रदेश अन्तर सरकारी वित्तीय हस्तान्तरणबाट पाँच करोड २८८ हजार,प्रदेश राजस्व बाँडफाँटबाट एक करोड ६७ लाख १३ हजार ,घरजग्गा रजिष्ट्रेशन शुल्क बापत २५ करोड र नगद मौज्दाबाट १५ करोड व्यहोरिने उपप्रमुख आलमले बताए ।
नगरसभामा बजेट प्रस्तुत गर्दै उपप्रमुख आलमले आगामी आर्थिक वर्षको बजेटका प्राथमिकतामा शिक्षा,स्वास्थ्य, कृषि, पर्यटन , सरसफाइ , वातावरण संरक्षण, गुणस्तरीय भौतिक पूर्वाधार र डिजिटलमैत्री सेवा प्रवाह रहेको पनि बताए ।त्यसअघि नगरसभामा बिरगंज महानगर पालिका प्रमुख राजेशमान सिंहले आगामी आर्थिक वर्षका लागि नीति तथा कार्यक्रम प्रस्तुत गरेका थिए । प्रमुख सिंहको अध्यक्षतामा भएको नगरसभामा प्रमुख प्रशासकीय अधिकृत अरबिन्दलाल कर्ण, ३२ वटै वडाका वडाध्यक्ष, कार्यपालिका सदस्य, वडासदस्य, कर्मचारी, सञ्चारकर्मी लगायतकाको पनि सहभागिता रहेको उपप्रमुखका प्रेस सल्लाहकार महमद सदाबले जानकारी दिए।
